Nongpoh, Jymmang 14:Mynta ka sngi ka Ri Bhoi Youth Federation (RBYF) Sengkmie ka la leit ban noh synñiang kumba 30 ban ka tin sop iing ha Sohpdok bad 7 ban ha Nonglum kiba hap ha Mawhati Konstituensi, ha Umroi Konstituensi, bad kat haduh kine ki sngi la nang sakhi ba ka jingnoh synñiang sha kitei ki lanot ka la nang kiew
Ha kane ka sngi ba la lamkhmat da u president ka seng u Bah Bipul Thangkhiew, general secretary u Bah August Sten, Finance secretary u Bah Liander Nongshli, lem bad kiwei kiwei ki nongialam na ka RBYF sengkmie.
Ha kaba ia kitei ki tin soping la ioh ban aiti noh ia u Rangbah Shnong ka Sohpdok u Bah Rocky Nongkhlaw ha ka jingiasakhilang ruh da u secretary Shnong Bah Wallambor Mylliem, u Bah Romes Mawlong u ba dei u wei na ki lanot ha katei ka jingjia lem bad kiwei kiwei ki riew rangbah.
U Bah Thangkhiew kum u nongialam ba ha khmat jong ka RBYF haba kren ha kane ka jingialang, nyngkong eh u la pynpaw ia ka jingsngewlem sha baroh kito ki para nongshong shnong jong ka Sohpdok kiba la hap ban mad ia kum kane ka apot shah lynshop ha ki bor jong ka mariang bad u la ai mynsiem ruh ia baroh ki lanot ba kim dei ban sngewpher ne sngewduh mynsiem noh namar kine baroh kidei ki jingpynbeit ryntih u trai kynrad nongthaw
U la ong ruh, u MLA ka thaiñ Mawhati u Bah Julius K Dorphang u la don bynta lang na ka bynta ban pynioh ia kine ki tin soping katkum ka jingdonkam kaba kyrkieh jong ki paidbah nongshong shnong kiba hap hapoh ka Mawhati konstituensi.
U bah Bipul kum u nongialam ka RBYF, u la kitbok kitrwiang ruh ia baroh ki paidbah nongshong shnong khamtam kito kiba la mad ia ka apot shah lynshop ha ka eriong langthari ba kin nang ioh ia ka met kaba koit kaba khiah bad ruh ba kin nang kiew ha ka kamai ka kajih jong ki kumba ki ju long baroh shikatta.
Na ka liang u Bah Rocky Nongkhlaw, kum u rangbah shnong ka Sohpdok haba shimti ia kine ki synñiang kiba la wan ai sngewbha da ka seng u la pynpaw ia ka jingsngewnguh kaba khraw sha ki nongialam bad ki nongkitkam jong ka RBYF kiba la kloi ban wan ban pynpaw ia ka jingsngewlem sha kito ki lanot.
U bah Rocky , u la pynpaw ruh ia ka jingsngewnguh kaba khraw sha baroh ki sengbhalang kiba la la wan ban noh synñiang sha kito ki lanot kiba shong basah ka shnong Sohpdok bad kumjuh ruh ia ki bor ba dei peit ia ka distrik naduh ka ophis jong ka Deputy Commissioner, Ri Bhoi District bad ruh na ka ophis jong ka Umsning C& RD Block kiba la lah shisha ban shimkhia na ka bynta ban pynioh ia ki jingiarap kiba kyrkieh sha ki paidbah kiba la mad ia kane ka apot da kaba pynioh ruh ia ka Relief Fund bad kiwei kiwei ki jingiarap kiba donkam.(SP News)
