Jowai, Kyllalyngkot: Ka Jaintia Youth Federation JYF Sengkmie hadien ba ka la ioh ia ka jingkyrpad na ki saw seng ka AJYWO, KSU-JHDU, FKJGP-KC bad ka HNYF-EJZ ban ai ka jingkyrshan ba pura ia ka jingiakhih jong ki, ka ban sdang mynta miet 27 bad 28 tarik mynta u bnai, ban pyrshah ia ka sorkar halor jong ka jingbym sngap jong ka ia ka jingdawa jong ki ban maramot noh ia ka surok bah NH 44, naduh wah mynsoo west jaintia hills shaduh Malidor East Jaintia hills.
Ka jingdawa jong ki saw Seng na ka sorkar ban Maramot noh mardor ia u surok NH 44 ka long kaba shongnia shong kun, kaba dei na ka bynta ka jingmyntoilang baroh kiba iaid ba ieng lyngba une u surok uba pyniasoh ia ka Jylla Meghalaya bad ka Assam, Mizoram bad Tripura.
Shuh shuh na ka liang u bah P L Majaw President ka JYF Sengkmie u ong, na ka bynta ka jingmyntoilang bad ka roi ka par jong ka Jylla Meghalaya lyngba une u surok shatei lam mihsngi ka Ri India uba ki nongleit nong wan ki bun bha man ka sngi, khamtam ha ka ba ia dei bad ka khaii ka pateng bad kiwei pat ki jylla , ngi pynrem jur ia ka jingsngap mynthi ka sorkar ha kaba ia dei bad une u surok NH 44 uba la ieh bein khlem pynbha shuh na ka liang ka sorkar.
Kumba ka long mynta ngi iohi ba ka sorkar ka mlien bha tang ban pynbiejkai ia ki nongialam sengbhalang da ka ba kular tang ka ktien ym da ki kam, ka ne ka jingkuman jong ka sorkar ka pynbor pynban ia ki samla ban shim ia ka ne ka sienjam da kaba khot syndon da ka padan surok miet ha ryngkat ka jingkyrshan ki paitbah nongshong shnong ka ne ka thain,
Imat ka sorkar ka kwah ba kino kino ki jingmyntoi jong ki paitbah kin long beit tang ha ka kular, ym ha ki kam ban kyntiew ia ka Jylla ha ka nam jong ka roi ka par. Lada ki sengbhalang kim shim jingkit khlieh na ka bynta ban pynkynmaw ia ka sorkar na ka por imat ba na liang jong ki nongmihkhmat kiba don hapoh ka jingialam u Dr. Mukul Sangma ki bunkam tang ban leitpan skim da ki hajar hajar klur na ka sorkar Kmie ban
pharia ia ka roi ka par tad haduh ba ki ba pun khun kin kha khun syndon hapdeng jong une u surok uba la pynjah nam pynjah burom ia ka Jylla ba u dei u surok uba sniew tam hapoh ka thain shatei mihsngi jong ka Ri India kynnoh shuh shuh u bah Majaw.
Na ka liang jong ngi kum ka JYF-EJH ngi dawa ruh na ka sorkar ba ka dei ban maramot noh wut wut ia une u surok NH 44 ha shwa ba ki paidbah kin ia mih madan ban pynbor ia ka sorkar da ki jingiakhih kiba khamjur namar kane kan ktah shibun ia ka ioh ka kot bad ruh ka shong suk shong saiñ ha ka jylla hi baroh kawei, pynkut u kyrwoh na u bah P L Majaw President ka JYF Sengkmie.(SP News)
