Jowai, Kyllalyngkot 21: Ka jingiakhih jong ki saw seng, kata ka AJYWO sengkmie, KSU-JHDU, HNYF-EJZ bad ka FKJGP-KC da kaba khot pynlong ia ka padan surok ba ar miet ha ka 27bad 28 tarik mynta u bnai ban pyrshah ia ka sorkar halor jong ka jingbym sngap jong ka ia ka jingdawa jong ki ban maramot noh ia u National Highway 44 ka la nang ioh jingkyshan shuh shuh na ki paidbah bad ruh ki sengbhalang, ha kaba mynta ka sngi, ka Synjuk Ki Rangbah- Shnong East Jaintia Hills ruh ka la ai ia ka jingkyrshan kaba pura ia kitei ki saw seng ban iaid beit sha khmat ha kane ka jingiakhih jong ki.
“Na ka liang jong ngi kum ka Synjuk Ki Rangbah Shnong-East Jaintia Hills, ngi ai ia ka jingkyrshan kaba pura ia ka AJYWO, KSU, HNYF bad ruh ka FKJGP halor ka jingiakhih jong ki da ka pakhang surok baa r miet ha ka 27 bad 28 tarik mynta u bnai ban pynbor ia ka sorkar Meghalaya ban maramot noh wut wut ia ka surok NH 44 kaba la ktah shi katdei eh ia u paidbah nong leit nongwan” la ong u Bah P.Dkhar, General Secreatry jong kane ka SRS-EJH.
U tei nongialam jong katei ka synjuk, u la ong shuh shuh ba dang ha kine ki khyndiat por ba la dep, ngi na ka liang jong ka Synjuk Ki Rangbah- Shnong East Jaintia Hills ruh ngi la dep thoh sha ka sorkar Meghalaya ban maramot ia katei ka surok National Highway naduh Mookyndur haduh Malidor. Ym tang ma ngi, hynrei kiwei pat ki sengbhalang na Jaintia Hills ruh ki la ujor sha ka sorkar ia kane ka jingsniew jong kane ka surok ha ryngkat ka jingpynmih khubor, hynrei phewse ka sorkar ka shuh sngap jar jar bad kam shym la leh ei ei ruh em haduh mynta ruh. Kumta na ka bynta ka bha ka miat jong u paidbah nong leit nongwan naduh ki nong Meghalaya haduh kiba na kiwei pat ki jylla ruh ngi ai ia ka jingkyrshan kaba pura ia kitei ka AJYWO, KSU, HNYF kiba la mih sha khmat da ka jingiakhih halor kane ka jingkuman jong ka sorkar jylla.
“Ka jinglong jingman jong kane ka sorkar kaba mynta, imat ka dei ka sorkar kaba kwah beit da ka jingiakhih bad ruh da ka huri hura. Lada ki seng bhalang kim iakhih ka sorkar kam ju bna ia ka khia ka shon bad ruh ka jingjynjar jong u paidbah. Lada ka long ka sorkar kaba trei shitom bad ka ba peit jngai na ka bynta u paidbah, kan jin da la iohi ia ka jingsniew palat jong ka surok NH 44 kat haduh ba ki paidbah ki la hap ban iam briew haba iaid lynti langba utei u surok”, la ong shuh shuh u bah P.Dkhar.
“Na ka liang jong ngi kum ka synjuk, ngi dawa ruh na ka sorkar ba ka dei ban maramot noh wut wut ia katei ka surok bah bad ba kam dei ban pynbor ia ki sengbhalang lane ki paidbah ban ia mih sha madan da ka jingiakhih namar kane kan ktah shibun ia ka ioh ka kot bad ruh ka shong suk shong sain ha ka jylla hi baroh kawei” la pynkut u Bah P Dkhar General Secretary ka SRS-EJHD.(SP News)
