Jowai, Rymphang 12: Ka jingpakhang shnong ba la khot pynlong da ka AJYWO-Sengkmie, KSU-JHDU, HNYF-EJZ, FKJGP-KC bad ka SRS-EJH ha ka 13 tarik mynta u bnai hapoh u pud u sam jong ka East Jaintia Hills District naduh ka por 5 baje mynstep haduh ka por 5 baje jan miet ban pynbor ia ka sorkar bad ka NHAI ban maramot ia u NH44 ka la ioh ia ka jingkyrshan kaba pura sa na ka seng jong ki 9-Shnong kaba don ha ka thian Elaka Narpuh ki shnong kiba don ha baroh arliang mamla jong ka NH 44 kata naduh ka shnong Chymplong haduh Rata-Cherra.
“Ngi kum ka seng jong ki 9-Shnong, kata naduh Chymplong haduh Ratacherra kiba don ha baroh arliang mamla jong ka surok NH44, ngi ai biang ia ka jingkyrshan kaba pura ia ki san seng, kata ka AJYWO, KSU, FKJGP, HNYF bad ka SRS-EJH halor kane ka jingkhot pakhang shnong jong ki ha ka 13 tarik mynta u bnai hapoh East Jaintia Hills District ban dawa na ka sorkar Meghalaya bad ruh ka NHAI ban maramot kloi ia ia baroh ki bynta ba la sniew jong ka NH 44 kata naduh Soomer haduh Malidhar” ong u Bah Silent Sutnga, Chairman jong ki 9-Shnong, u ba dei ruh u Rangbah Shnong jong ka shnong Umkiang lyngba u kyrwoh jong u.
“U Bah Sutnga u la ong shuh shuh ba ka jingsniew jong ka NH44 ka long kham kordit ha ki bynta ki ba hap naduh Sonapur haduh Malidor. Wat ki kali heh ruh ki la shitom bha ban iaid mynta. Ynnai ia kren shuh ia ka jingsniew jong ka NH 44 lashai la shisngi ynda poi sa ka por slap.”
“ Ki dak ki shin ki la paw shynna ba ka sorkar India bad ka sorkar Meghalaya, ki la iehbein shisha ia ka NH44 kaba dei u thied snam jong ka jylla Meghalaya bad ruh jong kiwei pat ki jylla jong ka thain shatei lammihngi jong ka Ri India da kaba haduh mynta ym I dak i shin ba ka sorkar kan maramot noh ia kane ka surok. Kumta kum ki paidbah kiba im ha ka ri synshar paidbah, ki san sengbhalang ki la leh ia kaba dei eh ban pynbor ia ka sorkar ban pynbha ia kane ka surok na ka bynta ka bha ka miat jong ki paidbah nongleit nongwan” bynrap shuh shuh u bah Silent Sutnga.
“Ngi kum ki nongialam jong ki 9-Shnong bad ruh lem bad u paidbah jong ka 9-Shnong hi baroh kawei, ngi ia snoh kti lang bad kyrshan pura ia kane ka pakhang shnong jong ki san seng khnang ban tied ia ki tyndong shkor ba kyllut bad ki khmat ba matlah jong ka sorkar ba kan maramot noh ia ka NH44” ong shuh shuh u tei u nongialam jong ki 9-Shnong, u Bah Sutnga.(SP News)
