Shillong, Kyllalyngkot 17: Ka jingialang jong ka Working Group-3, Meghalaya State Planning Board, kaba la ia kynduh mynneh 17 tarik Jan 2014, por 1 baje mynsngi, hapoh Committee Room -2 ban bishar bniah halor ka jingduna ki nongtreikam hapoh ki tnad bapher bapher jong ki lai tylli ki Autonomous District Councils bad mynneh ka la long bad ki officer jong ka GHADC. Na ka liang ka KHADC bad JHADC ki dang lum bad pynkhreh ia ki jingdonkam jong ki.
Ia katei ka jingialang la lum bad pyniaid da u Bah John F Kharshiing, Co-Chairman, MSPB, ha kaba la ia kren ia kiba bun ki jingeh jong ka GHADC kane ka long ka jingiakynduh kaba ar kaba nyngkong la long ha ka 5 tarik Dec 2013. Ka jingialang ka la neh kumba lai kynta bad kine harum ki long ki kam kiba la mih bad kiba la ia kren:-
Ki offisar GHADC ki la kyrpad ia ka State Planning Board ban kyntu ia ka Sorkar Jylla ban pynbeit thymmai ia ka rukom bynta ia ka ‘dan ka musur’ (Revenue Sharing) hapdeng ka Sorkar Jylla, ki lai tylli ki ADC, bad ki Hima/Elaka namar kumba ka long mynta ka duna palat ka jing mang tyngka ia ka GHADC. Kumba ka long mynta la bynta 25:75 ka jingbynta ka bhah bad ka GHADC ka dawa ban ioh 50:50 ha ka jingbhah ia ki dan ka musur. Ym pat tip kaei ka jingdawa na ka liang ka KHADC bad JHADC.
Ki bor GHADC ki la buh ia ka jingkyrpad ba donkam kyrkieh ban pynkhlain ia ki tnad Planning, Civil, Forest, Finance, Taxation (Enforcement), Land Records bad IT jong ka GHADC, ha kaba ki duna ki nongtreikam.
Ki la pyntip ba kumba long mynta namar ka jingduna ka pisa kim pat lah ban pyndonkam tikna ia ki kot IT ha ki tnad bapher bapher. Ka MSPB ka la ai jingmut ia ka GHADC ba ki lah ban thoh sha ka tnad IT Department jong ka Sorkar Jylla ban iarap ia ki ha kane ka bynta, khamtam ba kin ioh ban buh ia ka website la ka jong kumba la leh ha KHADC.
Ka MSPB Working Grp -3 ki la ai jingmut ia ki bor GHADC ban pyndonkam kyrkieh ia ki kor jingstad IT ha ki tnad Finance Dept, Transport Dept, Toll Gates, Ka jinglum ia ki Professional Taxes, bad Trading Licenses, khnang ba kan set ia ki thliew kiba lait bad ba kan iarap ban kyntiew pynjanai ia ki rukom lum khajna jong ki bor GHADC.
Ki bor GHADC ki la pyntip ba haduh mynta ki don baroh 1200 ngut ki nongtrei bad ka bai tulop ka long kumba antad Rs3 cr, ka jinglut shibnai, (Rs36 shi snem) bad ka jingioh na ka jingiarap /grant Sorkar jylla kytup ka jingioh na ki khajna ka long Rs 30 cr shisnem.
Ki bor GHADC ki la kyrpad ia ka MSPB ban shim khia ban iakren bad ka Sorkar halor ka jingdonkam jong kin pyrkhat kumno ban phah ki pulit ban trei hapoh ki ADC khnang ban iarap ia ki tnad Enforcement namar ki shem jingeh ha kiba bun ki liang ha ki por ba leit ban khynra ia ki briew kiba khlem Trading License namar ki Enforcement jong ki bor GHADC kim don ia ki bor ki iktiar jong ki Pulit.
Ki bor GHADC ruh ki la kyrpad ia ka MSPB ban ia kren bad ka Sorkar ban pynsuk, pynbeit thymmai ia ki rukom pyllait pisa na ka Sorkar Jylla sha ka GHADC.
Ha kaba ia dei bad ka jing bynta ia ka dan ka musur ba lum ki GHADC u Co-Chairman u la pyntip ba ki tnad Law bad Finance Dept ki sa thung hashen ia ka Meghalaya State Finance Commission, kaban long ka bor kumno ban ia bynta ki khajna hapdeng ka Sorkar Jylla, ki ADC bad ki Hima/Elaka.
Ki officer GHADC ki la pyntip ba ki donkam pisa kyrkieh ban ioh buh bad thung ia ki Additional District Judge bad ki Circuit Courts ha baroh san tylli ki Dsitrict hapoh Garo Hills.
Ha kaba iadei bad ka jingpynbeit thymmai ia ki kyndon jong ka Sixth Scheduled, ka tnad DCA Dept ki la pyntip ba ka Sorkar Jylla ka dang pule bniah bad ka dang don hapdeng ka jing khmih jong ki bor Sorkar Jylla, kumta ym pat lah ban ia kren halor kita ki jingtyrwa halor ka Sixth Scheduled.
Ka jingialang ka la rai ban ia kynduh biang ban ia kren halor ki jingduna ki officer jong ka KHADC, GHADC bad JHADC bad la bthah ia i Under Secretary, MSPB ban buddien bad ka KHADC bad JHADC ba kin phah ia ki jingtip kham kloi khnang ba kin lah ban iakren bad pyndep ia ka kaiphod halor ki jingeh jong ki ADC.
Ha katei ka jingialang jong ka Meghalaya State Planning Board, Working Group – 3 la pyniaid da u Bah John F Kharshiing, Co-Chairman, MSPB, bad Chairman Working Group -3, ha ka jingiadonlang u Shri. Francis PR Sangma, Co-Chairman, MSPB, i Dr(Kong) Eureka Lyngdoh Mawlong, Deputy Chairman, MSPB, u Bah. K S Nongbri, Joint Secretary, Finance(EA) Dept, i Kong. EM Lyngdoh, Under Secy, DCA Dept, u Shri. HA Sangma, Secretary, Executive Committee, GHADC, u Shri. RB Marak, SE, GHADC, bad kiwei kiwei ki officials jong ka tnad Meghalaya State Planning Board.(SP News)
