Jowai Naitung 08: Ka seng Jaintia Youth Federation (JYF) Seng Kmie ka ai khublei Behdein khlam basuk bakmen ia baroh ki khun ki hajar jong ka Sein Raij Jowai bad Tuber ba lyngba kane ka shad lehniam ba shisien shisnem ka ba ki khun ka Ri Jaintia ki bat naduh ka deinjat ki longshwa manshwa bad bud beit
bud ryntih ia ka niam ka rukom, ka riti ka dustur ka ba ngi ki nong Jaintia bad ju shad lehniam lyngba ka shad Behdein khlam naduh ki por hyndai hynthai.
Ha ka kyrwoh ba la pyllait da ka Seng ka ai ka jingkyrkhu kyrdoh bad ka jingkit bok kit rwiang ia baroh ki khun ka Ri Jaintia na ka bynta ka Beh-Dein Khlam ba kan long ka ba iaid beit iaid ryntih, ka ba dap
da ka jingsuk jingkmen ha ryngkat ka jingkyrkhu kyrdoh da u “Tre Ki Rot”, “U Nongbuh Nongthaw” ia kiei kiei baroh khnang ba ki khun ka Ri Jaintia kin ioh ia ka koit ka khiah, ka kamai kajih ka roi kapar ka shongsuk shong sain ha baroh ki liang jong ka jingim jong ki.
Ka JYF Seng Kmie da ka mynsiem jong ka jingieit bad jingsngew rit ka pynpaw ia ka jing iakmen lang bad phi ki khun ki hajar jong ka Seinraij ba phin nang kiew sha khmat ha ka jingiadei bad ka jinglehniam Behdein Khlam ba kan long kaba ishongkun shong Blei.(SP News)
