Jowai, Nohprah 22: Ka Jaintia Youth Federation JYF Seng Kmie ka ai khublei Christmas bad snem thymmai basuk bakmen ia phi baroh ki khun ki hajar jong ka bri u hynniewtrep hynniaw wasa ba lyngba kane ka jinglehniam ba shisien shisnem da ki pait khristan jong ka jylla, kyrmen ba ka nguh ka dem Blei kan long ka jingkyrkhu ia ki pait ka bri u hynniewtrep hynniaw wasa ba kin ioh ka met ka phad kaba khlain bad ba phuh ba phieng
lyngba ka roi ka par bad ka jingsuk ha ka mynsiem kymjuh ia ka Jylla hi baroh kawei.
Katkum ka kyrwoh ba la pyllait da u samla Niwasly Rymbai President ka JYF-EJH u kyntu jur ia ki khun samla kiba dei ka lawei jong ka Ri bad ka Jaitbynriew ba kin kynmaw ban ri la ka Akor ka burom ha kum kine ki sngi lehkmen shityllup ka pyrthei khnang ba kin nym mih kino kino ki jingeh, jingsniew kiba lah ban pynthut ia ka suk ka sain jong ka District bad ka Jylla hi baroh kawei.
Ka JYF da ka mynsiem jong ka jingieit bad jingsngew rit ka pynpaw ia ka jing iakmen lang bad phi ki khun ki hajar khristan jong ka Jylla ba phin nang kiew sha khmat ha ka tip briew tip Blei bad ban ieit bad burom ia ka jingsuk ha kum kane ka por.
Kum ban pynkynmaw ba ka JYF-EJH ha 20th-12-2013 ka la leit buh da ka jingthoh sha u DC halor ka jingjyllei ki dukan kiad beain bad ki Restaurant ba die kaid pathar ha East Jaintia Hills, ha ka ne ka jingia kynduh na ka liang u DC EJH u la kular hakhmat ki nongialam jong ka Seng ba un pynbna da ka sngi tyrkhong kiad ha baroh kawei ka District ha ka 25th,26th mynta u bnai khnang ba kan ym mih kano kano ka huri hura ne ka kulmar ha kum kane ka por rakhe Christmas ki khun khristan jong ka District.
Kumta na ka liang jong ka seng ka kyntu ia ki heh duh jong ki District (West&East) ba ki dei ban shim khia ban peit ngor bha ia ki riew shim kabu khnang ba kin nym ioh lad ban pynmih jingkulmar ha kine ki sngi rakhe Christmas jong ki pait khristan pynkut u kyrwoh khubor na ka seng.(SP News)
