Shillong,kyllalyngkot,24: Ka CSWO hapoh ka jingialam ka Kong Irene Hujon kum ka President ka ai khublei ia ka Joint Working Committee ki Lai Dorbar Shnong jong ka Upper Lumparing, Lower Lumparing bad Umkynrut-Kynjat Phutbol ha kaba iadei bad ka motion ba la wanrah da ka seng Kynhun Peitngor ha ka jingialang ba la long ha ka 12.11.11 ha Lumsohphoh Presbyterian School ha kaba iadei bad ka MUDA bad Municipal. Ha katei ka jingialang, la iadon ryngkat i Bah Sanbor Shullai, MLA-MDC, Bah P.N. Syiem (CEM ka KHADC) Bah Antonio War (EM), Paiem Latho Manik Syiem, Syiem ka Hima Mylliem, ki Rangbah Shnong jong ki Lai Dorbar ryngkat ruh ka Kong Irene Hujon, President ka CSWO bad ki paid nongshongshnong jong katei ka thain.
Ha katei ka jingialang ka seng CSWO ka la dap da ka jingkmen haba iohsngew na kitei ki rangbah ba pawkhmat kiba la iakren bad pynshai ia ka jingshisha halor ka jingshim kabu palat ka tnad MUDA bad ka Municipal bad halor katei ka jingshisha, ka Seng CSWO, sa shisien, ka ai khublei ia kitei ki Lai Dorbar Shnong kiba la shim khia da shisha ban pyrkhat lem na ka bynta u duk u suk uba la shah ban bein ha kata MUDA bad Municipal.
Bad haba phai pat sha ka jingshisha kumba la kren da i Bah Sanbor Shullai, MDC Laban-Mawprem ba ka Municipal ka dei tang ka nongsar surok kumba i la pynshai ha ka kotkhubor Nongsain Hima Dt 07.12.13 bad i la pynshai ruh ba wat ka hukum jong ka Supreme Court ha u snem 1999, kaba la pynmih hadien ka jingujor kaba la wanrah da ka (NTYU) pyrshah ia ka KHADC, ka la kren shai ba ka Shillong Municipal Board ka dei tang ka ophis ka ban peit ia ka bha ka miat jong ka imlang-sahlang bad ka dei ban peit ia ka khuid, ka suba.
Na ka liang ka CSWO ka kyrpad ruh ia ka jingiatreilang hapdeng ka District Council, ki Syiem ryngkat ki Dorbar Shnong khnang ban lah ban pynneh, pynsah ia ki riti dustur jong u paid Khasi-Khara hapoh ka Bri u Hynniewtrep.(SP News)
