Shillong Naiwieng 29: Ha ka kyrteng Ka Dorbar Ki Khlieh Nongsynshar ka Ri Hynniewtrep, (Grand Council of Chiefs of Meghalaya) ngi pynpaw ia ka jingsngewnguh kaba khraw ia u Dr Mukul Sangma, Chief Minister, na ka bynta ka jingiohi jngai ia ka jingwanrah bad ka jingsdang ia ka scheme Megha Health Insurance Scheme, kaba dei ka scheme kaba long universal (na ka bynta baroh ki longiing) bad kan bah ia ka bai sumar haduh 1.60 Lak tyngka shisnem man ka longing
Kane ka dei shisha ka scheme Sorkar kaba sah kynmaw kaban ia syriem kum ka MNREGS kaba la pynkup bor bad pynkylla dur ia kiba bun ki thain kyndong jong ka jylla Meghalaya
Ka jingai bhah ia baroh ki paidbah ia kane ka Megha Health Insurance Scheme khlem da pyniapher hapdeng ki BPL bad ki APL ka long kaei kaei kaba hap ban ia jingiaroh namar kiba bun ki longiing ki bym don hapoh ka BPL kim kot bor ban ioh bad wad ia ki jingsumar namar ka jingrem dor.
Kum uwei uba la iarap teng ia kiba duk kiba shitom katba leh eh, ka la long kaba sngewsih kthang ban iohi bun ki longiing kiba la hap ban khrong kat haduh ki la hap ban buh bynda ia ka jingdon jingem jong ki ban ioh ban pynmih ia ka jingdonkam pisa ban siew ia ka bai sumar ia kiba ha iing ha sem
Kane ka jingwanrah ia kum kane ka scheme kan long ka jingsah kynmaw ia ki mati u Dr Mukul Sangma, kum u Chief Minister ka jylla Meghalaya.
Kumba ki juh ong ba ki paidbah kiba don ka met ka phad kaba khlian kaba koit ki long ka spah kaba kordor ia ka jylla Ri bad ka jaidbynriew.
Ngi kyntu ia ka Sorkar India ba kan shim ia kane ka nuksa jong ka jylla Meghalaya bad ban pynshlur ia ka juh ka scheme sha kiwei pat ki jylla ka Ri India kum shi bynta ban kyrshan ia ki paidbah ba shitom jong ka Ri India
Sa shisien ngi pynpaw ka jing sngewnguh, ngi ai khublei ia kane ka jingiohi jngai jong u Dr Mukul Sangma, Chief Minister, ka jylla Meghalaya, bad ngi ngiet ba baroh ki paidbah kin myntoi shibun na kane ka scheme la ong u Bah John F Kharshiing (SP News)
