Jowai, Lber 25: Ha ka jingialang kaba la long ha ka 24 tarik March 2014, ha Raliang, u Bah Vincent H Pala, kyrtong MP jong ka seng Congress, u la kyrpad ia ki paidbah ka thain Raliang, West Jaintia Hills Dist, ban ai lad biang ia u sa san snem kum u MP khnang ban ioh buddien ia kiba bun ki kam na Delhi.
U la jer kyrteng ia kiba bun ki kam kiba ula buddien ha ka liang ka roi ka par, khamtam ha kaba iadei bad ki surok bah (National Highway), NEIGRIMS, Meghalaya High Court, Medical College, bad kiwei kiwei.
Ha katei ka jingialang la don lang u Bah John F Kharshiing, Vice-President, MPCC, uba la ong ba ka seng Congress ka long kum ka kynhun ialeh Football, bad bun ki player kiba tbit bad kiba long ki ‘all rounder’ teng teng u player uba tbit uba ia leh shakhmat u hap ban khih sha dien kum u defender lane kum u mid-field lane kum u ba mareh na sha ‘right wing’ ne ‘left-wing’.
U la pynkynmaw ruh ba teng teng ki player kiba paw ha ka pyrthei kum u ‘maradona’ u ‘messi’ ki shong kum ki reserve bad ki ai lad ia kiwei pat bad ki mih ha ki minit shwa ban wai. U la ong ba ka kam shakri paidbah kam dei tang lyngba kawei ka kam hynrei kidon bun ki rukom shakri paidbah.
U la ong ba ki paidbah ki don ka hok ban jied ia uba ki sngewbit, hynrei u la kyrpad ia ki ban pyndep ia ka hok ban leit thep vote ym dei ban pynlehnoh ei ia ka hok ban jied. U la ong ba ha ki Ri kiba la shai ki shah ot ka bording bad ka um haba ki pep ban thep vote, katba ha Ri India ki paidbah ki ioh ia ka jinglaitluid ban jied katba ki mon.
U la ong ba kiba kynnoh ba ka Congress ka dei ka seng kaba bamsap ka long kaba bakla namar dei ka Congress kaba ai ka hok ia ki paidbah ban ioh jingtip lyngba ka hok Right to Information (RTI) Act 2005, kat haduh la weng kam, la set bad kem ia katto katne ngut ki longheh kiba la shah kynnoh leh bakla lyngba ka ain ba la pynjari da ka Congress ha u snem 2005 lyngba ka ain RTI.
Na ka liang ka roi ka par ka seng Congress ka la wanrah ia ka ain kaba la kyntiew ia ki paidbah na ka jingduk lyngba ka scheme MGNREGS bad hapoh jylla Meghalaya la rung kumba palat 400 crore ka pisa mynta u snem ha ki kam MGNREGS. u la ong ba kumba 150 million ngut ki paidbah kiba duk ki la ioh jingiarap hapoh Ri India lyngba katei ka scheme
Kiwei kiwei kiba la kren bad kiba la iadon lang ki long u Bah G Sten, President, WJHD Congress Committee, u Bah Winning G Sungoh, MDC, Mokaiaw, u Bah Rio Sten, MDC, Borato, u Bah Bhawan Chyrmang, Ex-MDC, bad bun kiwei kiwei bad la pyniaid ia ka jingialang da u Bah B Dkhar, Rangbah Shnong, Raliang.(SP News)
