Shillong Jymmang 05: U President jong ka Federation of Khasi Jaintia and Garo People (FKJGP) u bah Joe Marwein ula ong ba ki 13 tylli ki sengbhalang kiba ieng ban dawa pyntreikam ia ka ILP ha ka jylla kin ai por shi taiew ia ka sorkar ba kadei ban pyllait noh mardor ia ki 3 ngut ki dkhot sengbhalang kiba la shah kem bad shah pynngat ha ki kyndon ain.
U Bah Joe Marwein haba iakren bad u nongthoh khubor ula ong ba ki nongialam jong ki 13 tylli ki sengbhalang kila iakynduh lang hynne ka sngi ha kaba kila shim ia ka rai ban dawa na ka sorkar jylla ban pyllait noh ia ki 3 ngut ki dkhot jong ki sengbhalang.
“Ngi dawa ba ka sorkar kadei ban pyllait noh ia u Readystone Nongrum bad u Johnny Sohkhlet jong ka KSU bad u Everson Syngkon jong ka HNYF bad ngi ai por ia ka sorkar ba kadei ban pyllait noh khlem kino kino ki kyndon ia kine ki dkhot hapoh ka lah sngi u Blei jong ka taiew ban wan bad kane ka jingai por ka sdang naduh mynta ka sngi” la ong u bah Marwein.
Shuh shuh ula ong ruh ba lada ka sorkar kam lah satia ban pyllait ia kine ki dkhot khlem kino kino ki kyndon ki 13 tylli ki sengbhalang kin sa iakynduh biang ha kaban kin sa pyrkhat kumno ban iaid shakhmat ha kaba iadei bad kane ka mat.(SP News)
