Shillong, Naiwieng 15: U Speaker jong ka iing dorbar thawain ka jylla u Bah Charles Pyngrope u la aipor shi bnai ia ki khatwei ngut ki MLA jong ka NCP,ha kaba ki la shah kynnoh ba ki la leit ban pyniasoh bad ka seng NPP kaba la ialam da u PA Sangma speaker ba rim jong ka Lok Sabha.
Haba kren ha u SP News Agency , u Speaker u la ong ba ki la pan por arbnai hynrei na ka liang jong u la ong ba u lai por ia ki tang shi bnai ba kin ai ia ka jubab halor ka jingmudui jong u MLA ka NCP na Laban u Bah Sanbor Shullai.
Ka jingkylla ha ka sian pyrthei hapoh jong ka seng NCP ka long ha dien ba u PA Sangma u la ia khun ia la election president jong ka India ha kaba ka seng NCP kam shym la ai ka jingkyrshan ia u bad kane ka la pynlong ia u Purno ba yn pynim ia ka seng NPP ha kane ka jylla Meghalaya.
Na ki 13 ngut ki MLA jong ka NCP khat 11 ngut ki la pynpaw ba ki long kiba la kloi ban leit sha kane ka seng kaba thymmai ia kaba la lam khmat da u Purno dei halor jong kane ba na ka liang jong u Bah Sanbor u la ai ia ka jingujor sha u Speaker jong ka iing dorbar thawain da kaba pynshong nongrim ha ki jingthoh kiba la mih ha ki kot khubor.
Kumba ka long haduh mynta na ka liang jong ki 11 ngut ki MLA jong ka NCP kiba la shah ujor kim shym pat ai kano kano ka jingthoh sha u speaker jong ka iing dorbar thawain jong ka jylla ban ong ba ki la leit pyniasoh ia la de bad ka seng NPP.(SP News)
