Shillong, Kyllalyngkot, 24: Hadien ba ka Joint Action Committee of All Teachers’ Associations of Meghalaya (JACATAM) ka la aipor khatduh ia ka Sorkar haduh 27 tarik mynta u bnai ban pynurlong ia ki mat jingdawa, hynne ka sngi na ka liang u Ambrose Ch. Marak, Director of School Education and Literacy (DSEL) u la khot iakren ia ki nongialam kane ka kynhun ki nonghikai ban iathuh ruh ba ka Sorkar kam shym la shong kli kti ha kaba iadei bad ka jingdawa jong ki.
U Bah B. Kular Khongjirem, Publicity Secretary ka JACATAM haba kren sha ki lad pathai khubor hynne ka sngi u la ong, “halor ka jingdawa jong ka Seng na ka sorkar ba kan shimti (provincialise) ia ka kam nonghikai, na ka liang u Director u la pyntip ba ia mynta ka Sorkar kan shimti ia ka kam nonghikai (provincialise) shwa tang ia ki skul ki bym dei kiba la pyniaid da ki Balang. Ka jingshimti jong ka Sorkar kan long tang ia ki skul kiba la pyniaid da ki riewshimet, da kiwei kiwei pat ki kynhun bad ki skul shnong.”
“Watla ngim don kano kano ka jingkynthoh halor kane ka rai jong ka Sorkar, pynban ngi sngew ba kane ka rai kam long satia kaba sngew iahap,” u la ong bad bynrap, “ u Director u la kular ha ngi ba un sa mih na Shilllong ha ka lah sngi u Blei ban leit wad jingtip na kiwei pat ki jylla la ka long ne em kaba biang ban shimti noh da ka Sorkar ia ka kam Nonghikai ha kaba un sa pyntip sha ki nongialam ka Seng ha u bnai Lber, 2014.”
Ha kaba iadei bad ka jingsiew tulop, u Director u la kular ba ka sorkar kan pyllait noh manla u bnai na ka bynta ki skul Deficit bad Adhoc, la ong une u nongialam kane ka kynhun ki nonghikai bad bynrap, na ka bynta ki skul Deficit ka Sorkar ka ladep pyllait haduh u Kyllalyngkot 2014, katba na ka bynta ki Adhoc, ki Deficit Pattern, ki Plan Adhoc la pyllait haduh u Rymphang, 2014. “U la pyntip ruh ba ia ka ‘Order’ la pynpoi sha ki District School Education Officer.” la ong u Bah Kular.
U la iathuh shuh shuh“Lait noh tang ia ki Non Plan Adhoc, yn sa pyllait kham hadien namarba ka don jingduna ha ka pisa, hynrei watla katta u la kular ba un sa pynstet ia ka kam,”
U bah kular “Ngi la iakren ruh ban dawa na ka Sorkar ba ka dei ban wanrah noh ia ka jingpynlong ia ka eksamin NET na ka bynta ki Science Stream kaba ju pynlong ha nongbah Guhawati,” u la ong. “Ha kaba iadei bad ka jingthung ia ki nonghikai, ngi kwah ba ka Sorkar kan iaid da ka lynti kaba khuid bad kaba shai,” u la pyntip. Ka jingiakren ruh ka long halor ka bai skul kaba iapher na kawei ka skul sha kawei pat. Halor kane ngi la dawa ba ka Sorkar ka dei ban pynmih ia ki kyndon treikam kiba shai ba ki Skul kiba la ioh jingiarap na ka Sorkar ka bai skul ka dei ban iaryngkat mar kat juh.
Ka jingiakren ha kane ka sngi ka long ruh halor ka jingthung ia ki Nonghikai ha ka Subjek Hindi ha ki skul nongkyndong bad kumjuh halor ka Ratio ba une kawei ka ne u nonghikai ka dei ban long tang 1 na ka bynta 30 ngut ki khynnah skul.
“Ngi la dawa ruh ba ka sorkar ka dei ban kyntiew noh ia ka snem shongthait jong ki nonghikai kan long na ka 60 snem sha ka 65 snem ngi la iakren sani ruh halor ka Dead-cum-Gratuity Retirement ha kaba u Director u la kular ban shimkhia ban ym pynslem shuh halor kane. U Director u la pyntip ba kito kiba la pynbiang ia ki kot ki sla ia ka bhah yn sa pyllait noh shen.”
Ha kane ka sngi la ialam ia kane ka kynhun da u Bah Kenneth Shadap, Vice President ha kaba la iadon lang ruh i Kong Bina Kharumnuid, Jt. Secretary, i Bah Poly Warlarpih, General Secretary ka KJDSTA bad Kong Ester, General Secretary ki Nonghikai Adhoc.(SP News)
