Shillong, Risaw 28: Hadien ka rai kaba la shim ha ka 2 tarik October 2013, ban kyntu jur ia ki bor KHADC ban thaw ia ka Ain ‘KHADC Clan Dorbar Bill 2013’, kum shibynta ban bteng ia ki kam Ka Dorbar Ki Khlieh Nongsynshar ka kyrpad jur ia baroh ki 3363 tylli ki Dorbar Kur ne Seng Kur Khasi Pnar ban pynpoi kyrkieh shi kopy ka Riti Pyniaid Kam lane ka Riti pyniaid Kur jong ki Kur Khasi Pnar baroh sha ka office jong u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep. Ha ka juh ka por la kyrpad ia baroh ki Dorbar Kur ne Seng Kur ban phah ia ka kyrteng, ka jaka buh office, ka mobile numbor jong ki nongkitkam kum u President/Chairman bad Secretary jong ka Kur.
Kane ka jingkrpad ka long namar ha kine ki sngi ki la don ki paidbah kiba wan wad na ka office jong ka Dorbar ia ka kyrteng bad ka mobile numbor jong ki nongkitkam jong ki Kur bapher bapher, bad ka buh ia ngi ha ka jingeh haba ngim don ka kyrteng lane ka mobile numbor jong ki Dorbar Kur ne Seng Kur kiba don ha kane ka bri u Hynniewtrep. Kum ka nuksa, la mih ka jingkylli shaphang ka No-objection Certificate na ka bynta ki kur ‘Nongrum’ mano ban ai NOC na ka liang u ka kur u Myntri Nongrum, Hima Sohra ne na ka kur u Myntri Nongrum, Hima Khyrim, namar ba don Myntri ha baroh ar Hima. Kumjuh ruh ia ki Kur Sohtun ki don Myntri ha Hima Mylliem bad Hima Khyrim bad ki long ruh ki Sirdar ha Hima Dwara Nongtyrnem bad bun kiwei kiwei ki nuksa, kumta la kyrpad ia ki Dorbar kur ne Seng Kur ban phah ia ka juh ka jingtip kyrkieh sha ki bor Deputy Commissioner, ki bor Elaka jong ka KHADC bad JHAD
Khnang ban lait na kano kano ka jingbakla khamtam ha ki DAK SPEL – ka Dorbar Ki Khlieh Nongsynshar ka Ri Hynniewtrep, ka kyntu jur ia ki Dorbar Kur ne Seng Kur baroh ba kin pyntip shai sha ki bor Deputy Commissioner bad ki bor District Council halor ka rukom spel ia ka jait ka khong jong ki khnang ban ia lait na kino kino ki jingeh ia ki longdien kiba lui lui.(SP News)
