Shillong, Nohprah 07: Ka kynhun na Gujarat kaba la wan sha kane ka jylla ban pan jingiarap na ka sorkar ban tei ia u mot jong u Sardar Vallabhbhai Patel ka la ia kynduh ia u Lat jong ka jylla u Dr K K Paul, hynrei kim shym la ioh ban ia kynduh ia u myntri rangbah ka jylla u Dr Mukul Sangma na ka daw jong ka jingbun kam ka jong u.
Na liang jong ka sorkar BJP ha katei ka jylla ka la pyrshang katba lah ban wad ki lad ki lynti kumno ban buh ia ka jaka kaba kyrpang ia u myntri kampoh iing ba nyngkong jong ka Ri India da kaba tei nam da ka durmot jong u Patel. Kane ka jingwan ka long ban kyrpad ia ka sorkar Meghalaya ba kan noh syniang lem.
Na ka liang jong u Ramanlal Vora, u myntri cabinet jong ka sorkar Gujarat u la ong ba ki don ka jingkyrmen ba ka sorkar Meghalaya ka noh syniang na ka bynta kane ka jingthmu kaba bha. Kane ka kynhun ka la ong ba u Patel ym shym dei tang jong ka Gujarat hynrei u dei jogn ka Ri baroh kawei. Ia kine ki ktien la kren da u myntri rangbah ka jylla Assam u Traun Gogoi ha kane ka kynhun.
Ban tei u mot ba paw nam ha ka kyrteng jong u Patel ka dei ka jinglam phrang jong u myntri rangbah katei ka jylla u Narendra Modi. Ia u myntri kam poh iing u ba nyngkong eh la tip kum u Iron Man kaba la pyniasyriem ia u bad u nar namar ka jinglah ka jong u ha kaba pyniaid ia ka Ri.
Kane ka kynhun kan lum ia ka khyndew na baroh ki jylla jong ka Ri India ban buh ha ka jaka kaba katei ka statue kaba jrong kumba 182 meter bad ka jinglut na ka bynta kane ka jingthmu ban tei ia katei ka statue kan long kumba T.2000 klur. Ka kyntien pyrta na ka bynta kane ka kam long, kawei ka Ri India ia u Mawnongrim jogn kane la buh da u myntri rangbah ka jylla Gujarat ha u bnai Risaw.
Ki nongrep jong ka Ri India ki la dep ban noh syniang na ka bynta kane ka kam ka la kot sha ka T.120 klur.(SP News)
.
