Shillong, Nailar 28: Ka seng Achik Mother’s Association (AMA) ka la pynpaw ia ka jingsngew khia kaba jur halor ka jingthud jong ka iew kahat ha Tura namar ba ki don ki kynhun ha ka kyrteng jong ka seng ki la klun sha lade ha kaba ia dei bad ka jingiai die iathied ia ujhur.
Halor kine ki jingjia na ka liang jong ka seng ka la leit ban ai ka jingujor sha u Chief Executing Officer (CEO), Tura Municipal Board halor kane ka jingeh kaba ki paidbah ki ia kynduh.
Ka president jong ka AMA ka Jova C Marak ka la ong ba ki don ki kynhun ha Tura kiba la register ki la sdang ban shim ha lade ia ka kam die jhur bad kane ka la pynlong ba kiew ka dor ka mur jong u jhur ha ka jaka ban ialeh ban pynhiar ia ka dor namar ka kala ktah ia u paidbah.
Na ka liang jong ka seng ka la kyntu ia ki paidbah ba ki dei ban thied ia ki jhur ki jhep ha ka dor kaba bit kumba la ia pynbeit lang bad ki bor jong ka Tura Municipal bad ka seng.(SP News)
