SHILLONG KyllaLyngkot,24: Tang shi sngi hadien bala pynbna ia ki kyrteng jong ki kyrtong na ka bynta ka election MDC 2014, ki nongkit kam jong ka party Congress jong ka Mawhati
Constituency hynne ka sngi kila mih noh na ka party ban ai jingkyrshan ia u Bah James Sylliang.
Ka jingiehnoh kam jong ki nongtrei jong ka party Congress ki kynthup naduh ki nongkit kam jong ka Zone bapher bapher bad kumjuh ruh ki nongialam jong ki Cirle bapher bapher, ki primary unit, ki Mahila bad kumjuh na ka liang jong ki Youth kiba dei na ka party Congress.
Kane ka jingmih noh ki nongialam ba hakhmat eh jong ka party Congress ka long kumba dkiah ia u budlum jong ka party Congress na ka Mawhati Constituency.
Ha kane ka kynti ba mynta wat na ka liang jong ka United Democratic Party (UDP) kila rai ban mih noh na ka party ban mih shakhmat na ka bynta ban ai jingkyrshan kaba pura ia u Bah James Sylliang ha kane ka kynti MDC.
Ki nongialam jong ka party Congress kiba la mih noh na ka party ban ai jingkyrshan ia u Bah James Sylliang kiba dei na ki thain bapher bapher ki kynthup ia ka Zone jong ka Mawlasnai hapoh ka jingialam jong u Bah Nesius Thongni kum u General Secretary bad baroh ka kynhun ka jong ki, kila mih lut ba kynthup ia ki nongialam bad ki nongtrei jong baroh ki Primary Unit kiba don ha kane ka Zone lait noh tang katto katne ngut kiba neh ha ka party.
Na ka liang jong u Bah Thongi u la pynpaw ba ma u lem bad kiwei ki paralok kiba dei na ka party Congress kila mih noh na ka party ka dei namar ba kim hun ia u kyrtong ba ka seng Congress bad dei halor kane ka nongrim ngi la mih noh na ka party ban kyrshan ia u Bah James Sylliang.
Na ka liang jong u Bah Never Makdoh uba dei u General Secretary jong ka Youth Congress na ka Mawhati bad kumjuh na ka liang jong ka Youth Congress na ka shnong Thad lem bad ka kynhun baroh kawei kila mih noh na ka party ban ai jingkyrshan ba radbah ia u Bah James.
Shuh shuh na ka liang jong u Adviser jong ka Youth Congress na ka shnong Syngku lem bad ka kynhun ka jong u kila kynriah bad mih noh shi syndon na ka party Congress bad kyrshan ia u Bah James, lait noh tang wei ar ngut kiba dang neh ha ka party.
Na ka liang jong ki nongialam kiba dei na ka thain Mawrong hapoh ka jingialam jong u Bah Moving Mukshiar bad u Bah C Barim ryngkat bad ki nongtrei jong ka party da kawei ka jingmut kila rai ban mih noh na ka party bad kumjuh ruh ki nongkyrshan jong ka party.
Ym tang katta wat na ka liang jong ki nongkit jong ka Mahila Congress Committee jong ka Mawhati hapoh ka jingialam jong ka President ka Kong Juliana Diengdoh lem bad ka kynhun ka jong ki, kila rai ban kyrshan beit ia u Bah James Sylliang.
Ki dang don bun ki nongtrei ba shit rhem bha jong ka Party Congress kiba la don ka jingthmu ban mih noh na ka party Congress namar ba kim hun staia ia u Bah RB Shdap uba dei u kyrtong na ka seng congress ban iakhun ha kane ka election MDC.
“Ia mynta ngin ia lum lang shwa ia baroh ki dkhot bad kumjuh ruh ia ki paralok kiba ia trei lang ha ka seng congress ban ia pyrkhat ban mih noh shi syndon bad ruh ban leit ai noh ia ka jingkyrshan ia u Bah James Sylliang” la ong u Bah Hoping Stone Marsing uba dei u President jong ka Nongsangu jong ka Primary Unit.
Kaba kham sngewtynnad eh ka long ba wat lada don kiba ym pat mih na ka party congress hynrei kila rai da kawei ka jingmut bad a lei lei kin ym kyrshan ia u Kyrtong ba pynieng da ka party Congress hynrei kin ai beit ia ka jingkyrshan kaba pura na ka bynta u Bah James.
Kiba bun ki nongialam jong ka Congress kiba la mih noh na ka party kila pynpaw ba kim hun satia u kyrtong uba ka seng congress ka pynieng na ka Mawhati Constituency na ka bynta kane ka election MDC 2014.
Wat na ka liang jong ki nongialam ba ha khmat eh jong ka UDP ruh hapoh ka jingialam jong u Bah Richard Lyngdoh uba dei u General Secretary jong ka Mawhati Sub Circle lem bad ki paralok jong u kiba dei na kajuh ka partykila ieh noh shi syndon ia ka UDP.
H kajuh ka por na ka liang jong u Bah K Phonis Lyngdoh uba dei u Adviser jong ka UDP na Syngku uba dei ruh u snar bah jong ka UDP uba la ju bat teng kum u Vice President jong ka Mawhati Sub Circle uba la don ha ka UDP naduh da dang sdang ban kha ia ka UDP u la mih noh na ka party UDP ban ai jingkyrshan ia u Bah James Sylliang.
Bun na ka liang jong ki nongialam ba ha khmat eh jong ka UDP bad MCPC halor ka jingduh tiket jong u Bah Sylliang kila pynpaw ia ka jinghun ka jong kid a kaba kila pynpaw “Ngi sngew hun hi jrut ba phi khlem ioh ia ka tiket na ka party Congress, ngin trei shitom bad aiti ha u Blei bad ngi kyrmen skhem ba phin poi sha ka thong” la pynpaw u Bah Richard Lyngdoh.
Na ka liang jong u Bah James Sylliang u la pynbna paidbah wat hadien ba u la duh noh ia ka tiket na ka party Congress hynrei u la rai rangbah ban iaid shaphrang beit ban iakhun kum u kyrtong shimet ha ka election MDC 2014.
“ Haba ki paidbah nongkyrshan jong nga kiba la ia don lang ha syndah bad nga, ngan ym lah ban shet kylla ia ki bad dei halor kane nga pynbna paidbah ba ngan iakhun beit ha kane ka election MDC” la ong u Bah James Sylliang.(SP news)
