Shillong, Lber 26: Ka Greater Laban Community Development Society(GLCDS) kala ujor ha u Syiem ka Hima Mylliem pyrshah ia ki 3 ngut ki Rangbah Shnong kiba iadonbynta ha ki kam politik bad pynkhein ia ka Mylliem Act Section 20 (1) bad (3) jong ka Khasi Hills Autonomous District Council (Appointment and Succession of Syiem,DeputySyiem,Electors and Rangbah Shnong of the Mylliem Syiemship) Act 2007.
U Joint Secretary ka GLCDS u bah H Ryntathiang ula ujor ia ki 3 ngut ki Rangbah Shnong kiba kynthup ia u Rangbah Shnong ka Upper Lumparing u bah HB Wahlang, u Rangbah Shnong ka Lower Lumparing u bah FB Khongsit bad u Rangbah Shnong ka Umkynrut Kynjatphutbol u bah Banrikupar Wahlang halor ka jingiashimbynta ka jongki ha ki kam sain pyrthei.
Hadien ba ka ophis treikam u Syiem Mylliem kala iohpdiang ia kane ka jingujor kala phah da ka shithi sha kine ki 3 ngut ki Rangbah Shnong ba kidei ban wan mih sha ka iing dorbar kaba don ha Mawkhar ban iakren bad ban pynshai halor kane ka jingujor ha ka 16 tarik u Iaiong 2013 ha ka por 2 baje nohphai sngi.(SP News)
