Shillong, Iaiong 03: Ka Grand Council of Chiefs of Meghalaya, (kaba kynthup ia Ka Dorbar Ki Khlieh Nongsynshar Ka Ri Hynniewtrep, Federation of Khasi States, Ki Sirdarship, Ki Dolloi) kaba la ia kynduh mynta ka sngi, 3 tarik April 2013, ha office Lumbasuk, Demthring, Shillong halor ka shithi na ka tnad Ministry Home Affairs, Sorkar India, ba la phah copy da ki bor KHADC halor ka jingpynbeit thymmai ia kiba bun ki kyndon jong ka Sixth Schedule (6th Schedule Amendment Bill 2012 ) jong ka Constitution Ri India, kynthup ia ka jingdonkam ba ka Sorkar ka dei ban pyndep ia baroh ki jingkular katkum ki dulir jingiateh kular bad ki kyndon Instrument of Accession and Annexed Agreement IOA & AA, ba la pdiang da ka Sorkar India ha ka 17 tarik August 1947
Hadien ka jing ia tai kaba jan san kynta ka Dorbar ka la pynpaw ia ka jingsngew hun ba khatduh khatwai ka tnad Ministry of Home Affairs, ka la pynpaw dur byrngut byrnget bad pdiang ba ha ka jylla Meghalaya ki don ki Dorbar Synshar tynrai, kiba kyrpang, hynrei ka la don ka jingsngew ba ki jingsynshar tynrai naduh Dorbar Kur, Dorbar Shnong Dorbar Raid bad Dorbar Hima ki ba don hapoh ki 54 tylli ki Hima hapoh Khasi Hills, 18 Dolloi & uwei u Sirdar hapoh Jaintia Hills, bad 1400 ngut ki Nokma ki Hima ki dei ban paw dur ha kaba shai ha katei ka amendment jong ka Sixth Schedule bad halor kane la shim ia kine ki rai.
Ba ka jingpynbeit thymmai ia ka Sixth Schedule ka dei ban kynthup bad paw dur ka ki dulir jingiateh kular bad ki kyndon Instrument of Accession and Annexed Agreement IOA & AA, ba la pdiang da ka Sorkar India ha ka 17 tarik August 1947, lym kumta kan long kaba shitom ban ia kren bad ia pynbeit ia u pud u sam jong ka Ri bad ka Bangladesh bad ka Assam.
Ban kyntu ia ki bor Sorkar Jylla bad District Council kum ba la kdew hapoh ki shithi na ka Ministry of Home Affairs ba kin pynsted ban thaw ia ki Ain jong ki jingsynshar tynrai (Synshar, Khadar bad Bishar) naduh Dorbar Kur, Dorbar Shnong, Dorbar Raid bad haduh Dorbar Hima.
Ba ki kyntien kyrteng Dorbar Kur, Dorbar Shnong, Dorbar Raid, Dorbar Hima, (Syiem, Lyngdoh, Sirdar, Wahadadar, Dolloi and Nokma) ha ka jaka ka kyntien ‘chiefs’ ki dei ban paw dur hapoh ka Sixth Schedule katkum ki kyndon jong ka IOA & AA.
Ba ka dei ban don ka Council kaba khlem party less na ka bynta ki Syiem, Lyngdoh, Sirdar, Wahadadar, Dolloi Nokma, kynthup ia ki nongmihkhmat na ki Dorbar Kur, ki Rangbah Shnong, Sordar Shnong, hapoh kane ka jingpynbeit thymmai jong ka Sixth Schedule.
Ba ki lai tylli kata ka Khasi, Jaintia bad Garo Autonomous District Council ki dei ban ioh jingshai na ki bor jong ka Ain halor ka jingpynshai ia ka ain Section 7, jong ka Indian Independence Act 1947, ka Instrument of Accession and Annexed Agreement(IOA & AA) kaba la pdiang bad soi da ka Sorkar India ha ka 17 Aug 1947 bad halor ka jinglong beain ka jingdon jong ki Municipal hapoh ka jylla Meghalaya (khamtam hapoh u pud u sam jong ki Khasi States).
Ban lum ka ka jingialang ka jingiakynduh bad baroh ki seng bhalang ha ka taiew ba nyngkong jong u bnai May ban ia syllok halor kane ka jingpynbeit thymmai ia ka Sixth Schedule.
Ba ki Hima kin lum bad pynlong ia ki jingialang paidbah kum shibynta ban pynshai ia ki khun ki hajar ha kyllen ka Ri Khasi, Jaintia and Garo Hills halor katei ka dulir kaba la ioh na ka Parliament ha kaba la kdew ia ki hok jong ki Khasi States, ia kaba la khot ia katei ka dulir ‘White Paper on Indian States’ kaba la wanrah bad buh hakhmat ka Constituent Assembly (Indian Parliament) ha ki snem 1948 bad 1949 da u Sadar Valabhai Patel, Deputy Prime Minister, i/c Ministry of States ia kaba la khot mynta ka Ministry of Home Affairs.
Ban ia kynduh ia u Dr Mukul Sangma, Chief Minister, Meghalaya, bad ai ha u ia ka rai jong ka Special Dorbar Ri kaba saw (Peoples Parliament) kaba la long 13 tarik Feb 2013, khamtam ha kaba iadei bad ka jingdonkam ban pynbeit thymmai pynkhlain ia ki kyndon jong ka ain Meghalaya Transfer of Land Regulation Act 1971, ia kaba ym shym la pyntrei kam katkum ka jingthmu jong ka.
Ban pyrshang ban leit ia kynduh ia u Prime Minister bad u Home Minister ka Ri India ban ioh jingshai halor ka jingsah teng ban pyntrei bad pyndep ia ki jingkular jong ka Ri India kum ba la kdew hapoh katei ka dulir ‘White paper on Indian States’
Ban ia kynduh ia ka Smt. Ranee Narah, Union Minister of State for Tribal Affairs, Govt of India, ha ka 8 bad 9 tarik April 2013, hapoh New Delhi.
Ban lum kyrkieh ia ka Dorbar ha 19 tarik April, 2013 por 11baje mynstep ha shillong ban bteng ia ka jingpyrkhat halor kitei ki jingpynbeit thymmai ia ka Sixth Schedule.(SP News)
