Shillong Naiwieng 20: U Vice President ka Khasi Students Union u samla Fredrick Kharmawphlang ula pynpaw ba ka jingkem ia u bah Anthony Kharbuli kadei ka jingleh donbor bad ka jingthombor jong ka sorkar ia kaba ym lah ban pdiang da lei lei ruh. Ula ong ruh ba kane ka pyni ruh ba ka sorkar ka shu ialeh ban pynkbum jubor ia kiba kren ia ka hok bad ka jingshisha bad ula buh jingkylli ia ka sorkar ba lada u bah Anthony ula pynshit ia ka jingialang ha Madan Student, hangno ka don katta ka hok ban kren laitluid (Freedom of Speech) ha katta ka ri synshar paidbah(Democracy) bad ka pawshai ba ka jingleh ka sorkar kadei ban suh syrdep ia baroh ki shyntur na ka bynta kito kiba kren na ka bynta ka jingsngewkhia ia ka jinglong jingman bad ka mat jong ka jylla hi baroh kawei.
“Lada u bah Anthony u kren pynshit ha ka jingialang ha Madan Student mano pat ba pynshit ban leit pynpra ia ki iing ki sem ha Umsawli bad la dei ban kem shwa ia kito kiba leit pynshit ban pynpra ia ki iing ki sem jong kito ki paradoh parasnam hapoh Umsawli. Ka jingleh ka sorkar kadei ka jingsynshar donbor bad kane ka paw tyngkrein ba kane ka sorkar mynta kala shu synshar donbor da uwei u briew ne ka Dictatorship Govt bad kiba don lang ha ka sorkar ruh kidei ki Niangkohnguh bad ki ngat lang ha katei ka thup ba kidei ki nongsynshar donbor” la ong u samla Fredrick Kharmawphlang .
Une u samla ula ong ruh ba ak KSU ka pynrem jur bad kam lah ban pdiang ia ka jingleh ka sorkar namar ka paw ba uno uno u briew uba kwah ban kren ia kaei kaei ka bym iahap bad ka jingleh ka sorkar yn ngat ha ka jingpynsajia bad kane ka dei ka jingthombor im im peit peit katba kito pat kiba kren na ka bynta ka sorkar, ka sorkar ka pdiang ia ki, katba kiba kren pyrshah sorkar pat ka sorkar ka thaw da ki lad ki lynti kumne kumtai ban pharep bad pynshitom ia ki da kumne kumtai.(SP News)
