Shillong Naiwieng 26: U headmaster ka Mid Changdong Nongsyllei
Secondary School, Lawbyrtun u Bah Fairson K Jana u la rai ban ujor sha
ka tnad State Election Department halor ka jingbym siew ia ka bai
pyniaid elekshon sha ki polling officer (PO) da u SDO (civil) ka
Mairang kiba la bynshet ha kane ka elekshon MLA ba dang shu dep shen.
U Bah Jana u la shim ia kane ka lynti ban iakhun ia ka hok jong ki
paidbah kiba phah kam ha kane ka elekshon hadien ba u la lap da ka RTI
ba u Sub-Divisional Officer Mairang Sub Division um shym siew dep sha
ki polling officer jong ki 102 tylli ki polling station ha Mairang bad
Mawthadraishan.
Katkum ka dor kaba la mynjur da ka Commission, u Bah Jana u la ong
ba u First polling officer ha kawei ka polling station u dei ban ioh
T. 250 shi sngi, u Second bad u Third polling officer u dei ban ioh
T.175 shi sngi bad u Fourth polling officer u dei ban ioh T.100 shi
sngi. ‘Katkum ka jingbthah jong ka ECI, ki polling officer ki dei ban
siew phra sngi hynrei katkum ki kot ki slake RTI, la pyni ba ki
polling officer ki ioh jingsiew tang saw sngi bad ka la jah saw sngi”,
la ong u headmaster.
U la ong ba u SDO u la khate kumba T. 3600 kaba dei saw sngi ia ki
polling officer ha kawei kawei ka polling station bad kane ka long
beain.
“Nga la pan jingtip da ka RTI ban tip ia ka dor ba siew sha ki
polling officer ha ki constituency bapher bapher ha Ri Bhoi bad ha
East Khasi Hills,” la ong u Bah Jana bad bynrap ba un bteng ban iakhun
ban pynioh ia ka hok jong ki polling officer kiba dei hok ban ioh ia
ka bhah jongki kumba dei.(SP News)
