Shillong, K`Lyngkot 12: Ka kompani sam lyer tyndong shet jingshet (LPG) ha sor Willamnagar, East Garo Hills ba la tip kum ka M/s Jims Flame ka la pynkhreh ban sangeh treikam bad ban khang khyrdep shisyndon hadien ba ka la ioh pdiang ia ka shithi dawa pisa kaba haduh T.25 lak na ka seng kaikhlaw Garo National Liberation Army (GNLA). Ia kane ka shithi dasa pisa jong ka GNLA na katei ka kompani la ioh pdiang da u Manager jong katei ka kompnai LPG.
Ki thymmei khubor ki la iathuh ba namar katei ka jingjia shah dawa pisa bad sangeh sam LPG jong katei ka kompani, ki briew jong ka tnad Supply ka East Garo Hills district ka la hap ban sam hi noh ia ki tyndong lyer shet jingshet sha ki paidbah ba pyndonkam ia ki.
Shuh shuh u Deputy Commissioner u la ong “ka Supply Branch ka la hap ban leit sam hi ia ki tyndong LPG sha ki paidbah kiba la book ia ki tyndong naduh ki ar taiew kiba la leit noh”. Ha kajuh ka por u DC u la ong, katei ka jingshah dawa pisa jong katei ka kompani ka la jia ar taiew mynshuwa, u Manager jong ka M/s Jims Flame u la ioh pdiang ia ka shithi dawa pisa ba T.25 lak na ka kynhun kaikhlaw GNLA.
“Hadien kata, u manager u la phet noh sha Tura hadien ba u la khang ia ka kudam jong u. Dei naduh katei ka por ba ki paidbah ki la iakynduh jingeh ban ioh ia ki tyndong lyer shet jingshet”, la ong u Deputy Commissioner.
U Mantri u la iathuh ba ki seng bhalang jong ka thain ki la ujor sha u Deputy Commissioner (Supply) ha kaba iadei bad ka jingkhang khyrdep ia katei ka kompani sam tyndong lyer shet jingshet. Kumta, dei hadien kata ba u DC (Supply) u la hukum ia u EAC (Supply) ban leit shimti noh da ka bor jong ka tnat Supply ia katei ka kompani da kaba plie ia ka kudam na ka bynta ban sam hi noh sha ki paidbah.
U la pyntip ruh ba hadien kane, u DC (Supply) u la iakren bad ki bor ba halor jong ka IOCL ha Guwahati kiba la phah shi trok ki tyndong LPG sha ka district.
