Jowai, Naiwieng 28: Kumka dak ban pynpaw iaka jingpyrshah bad pynrem jur iaki riew runar ba donkti dung pyniap ia u Rangbah Shnong ka Jalaphet Bri Sumer u ma Ken Syrti bad ha ka juh ka por ban pynpaw lem iaka jingsngewsih halor jingshah pyniap utei u Rangbah kumta naka liang ka Dorbar Shnong Jalaphet Pyllun ryngkat bad ka jingkyrshan lang ka Khasi Students’ Union Jalaphet Unit ki la rai ban khot daka jingpakhang shnong haka 30 tarik mynta.
‘Ngi la rai ban khot daka pakhang shnong haka 30 tarik mynta u bnai kum ka dak ban pynpaw lem iaka jingsngew pyrshah bad iaka jingsngew sih lang jong baroh ki nongshong shnong hapoh ka shnong JalaphetPyllun halor jingshah pyniap ba khlem nongrim u Rangbah shnong jong ngi ‘ la ong u Ma H.Chyrmang Rangbah Shnong barim ka Jalaphet Pyllun.
‘Kane ka jingkhot pakhang shnong ha katei ka sngi ka long tang naka bynta ki dong/kyntoit bahap hapoh ka shnong Jalaphet Pyllun’ la ong shuh shuh u tei u Rangbah.
Katei ka jingpakhang shnong kan long tang iaki dukan bad kali kamai bad kali kit dewiong, hynrei la pyllait pat iaki kali rit ba leit leit on thang ha katei ka sngi.
‘Ngi kyntu iaki trai dukan bad ki para nongshong shnong jong ka shnongbaroh kawei bakin sngewbha ban nym plie dukan ne leit trei leit ktah ha katei ka sngi hynrei kidei ban iamih lang khrui baroh naduh dang step naka bynta ban leit on thang ia utei u Rangbah ha katei hi ka sngi kum ka dak ban pynpaw jingsngewsih lang’ la ong u samla Emmon Chyrmang President ka KSU Jalaphet Unit.
Lah ban pynkynmaw ba ia utei u Rangbah la pyniap daki 5 ngut ki runar kiba pakhang lynti ia u daka Maruti Gypsy bymdon number haka shnong Moopala haka 22 tarik mynta u bnai. Naba ula shitom bad mynsaw jur kumta la pynkit ia utei u rangbah sha Woodland Hospital Shillong, hynrei ula khlad noh haka 27 tarik janmiet.
‘Ngi kum ki nongshong shnong ngi dap daka jingsngewsìh bad sngewphylla halor katei ka jingshah pyniap utei u Rangbah Shnong jong ngi, namar haduh mynta ngi pat tip eiei ruh iaka daw tynrai bad naka liang jong ngi kum ki nongshong shnong ngim juh iohi dak sniew eiei ha utei u rangbah, hynrei u shait long u briew uba jai jai bad treihok iaka kam’
la pynpaw kitei ki arngut ki nongialam. ‘Ngi pynrem jur iaki runar ba donkti pyniap ia u Rangbah shnong jong ngi bad ngi kyntu jur ruh ia ki bor ka ain ban thwet haduh banda ioh kem iaki tei ki runar’ la pynkut katei ka kyrwoh.(SP News)
