Jowai, Jymmang 05: Namar ka jingjyrwit jyrwat bad shimpor palat haba ialeh iaka syrnot sngikha (Birth Certificate), na ka liang ka JSU Sengkmie hapoh ka jingialm jong u General Secretary Samla Emperor Bareh myn ha kine ki sngi ki la ia kynduh ia u Deputy Commissioner jongka West Jaintia Hillls, bah PS Dkhar bad buh ha khmat jongu iaka jingkyrpad ban tuklar lem bad ban wad iaki lad ki lynti kumno ban kham pynsuk iaki ki kmie ki kpa haba ki ialeh iaki syrnot sngikha jongki khun jongki khamtam eh kito kiba pule haka Klass Nine namar ki hap ban ioh beit ia kane ka certificate khnang ba kin dup lah ban register ialade hapoh ka MBOSE.
Ha kine ki khyndiat sngi na ka liang ka JSU kala ioh ban sakhi ha kaba ka jingshimpor palat ha kaban ialeh iaka Syrnot Sngikha kala pyndiaw bad pynjynjar mynsiem ia ki kmie ki Kpa jongki khynnah skul kiba la leit ap beit shapoh DC Ophis ban ioh ia kane ka Certificate, ym tang katta hynrei la ioh jingtip ruh ba don bun ngut ki khynnah skul khamtam kito kiba wan na ki nongkyndong kiba ia kynduh mawsiang namar don ki skul kiba la pynbna baka tarik ba khatduh ban pynpoi iaka ki kot ki sla ban ioh Register shapoh MBOSE kala kut naduh kine ki sngi kiba la deb, bad bun ki khynnah Skul kiba la ia kynduh ia kane ka jingeh kim ban se ban jaw ummat bad don ruh kiba la pep naki skul da ka jingartatien jongki la kim lah ne em ban kiew klass namar ki khlem ioh iaka Syrnot sngikha tad haduh bala kut kane ka sngi ba khatduh ban phah sha ki Skul khnang ban ioh register iaka kyrteng jongki hapoh MBOSE.
kane ka jingjyrwit jyrwat haba aplai ia kane ka Certificate ka mih naduh ba la duh ba la dep pyniakhlad pura iaka Judicial bad ka Administrative, bad kane ka jineh ka la pynpisa jingmut ia ki kmie ki kpa nalor ba ki hap ban pynlut iaka por ka sngi bad kumjuh iaka pisa kaba bun ban iabeh beit sha DC Ophis ban ap ia kane ka Certificate.
kumta ka Jaintia Students’ Union daka mynsiem kaba sngewkhia kala buh iaka jingkyrpad hakhmat jong u Deputy Commissioner jongka West Jaintia Hills kumjuh ruh iaka Bar Council Jaintia Hills ban wad iaki lad ki lynti kumno ban kham pynstieng ia kane ka kam khnang ba ki khynnah skul kim ym da donkam than ban khuslai haba ialeh ia kane ka Certificate. Ha ka juh ka por ka JSU ka buh ruh iaka jingkyrpad ia baroh ki Skul bad ki nongpyniaid jongki Skul ba kim dei ban pynduh mynsiem iaki khynnah Skul kiba shong Klass Nine, hynrei la kyrpad jur iaki ruh ban iarap kumno ban wad iaki lad ki lynti khnang ba ki khynnah skul kin ym duh jingkyrmen halor kane.
shuh shuh na ka liang ka JSU ka la buh ruh iaka jingkyrpad iaka MBOSE ban kham pynjynsur iaka tarik kaba khatduh (Last date) ban pynpoi ia kine ki Certificat jongki khynnah skul khamtam eh ha kum kane ka por kaba ki kmie ki kpa ki la khih khohreh bad pisa jingmu shaba palat naka bynta ki khun ki kti jongki.(SP News)
