Shillong, Nohprah 14: ka national high way- 44 ha ki bynta jong ka Jaintia Hil
ls kala sniew sha ba palat, khamtam eh na Jowai West Jaintia Hills shaduh Ratachera ki bynta jong ka East Jaintia Hills ka jingsniew jong kane ka surok ka long kaba la palat ha kaba ym lah ban ong ba ka dei ka National Highway.
Ki seng bhalang katei ka thainm kum ka KSU, JSU, JYF bad ka synjuk ki rangbah shnong kila khot ia ka pakhang shnong ban dawa na ka sorkar ban shna ia kane ka surok hynrei da ka jingkhot ia kren jong u Deputy Commissioner jong ka East Jaintia Hills halor ka jingkular ba ka sorkar kan sa shna ia kane ka surok ki la weng noh ia ka jingiakhih ka jong ki.
Haba u SP News Agency u la leit ban peit ia katei ka surok la shem ba ka jingujor jong ki paidbah kiba dei na katei ka thain ka long kaba shisha namar kane ka jingsniew jong ka surok ka la long naduh Jowai haduh ter ter sha duh ki thain Mynkry ka jaka ba don ki karkhana dewbilat.
Ki briew katei ka thain ki la ong ba mynta kim nangshuh kumno ban ong bad ia no yn kynnoh la ka dei na ka jingbym lah jong ka sorkar jylla ban ia kren lem bad ka sorkar pdeng ban shna ia kane ka surok ne dei ka jingbym salai jong ka NHAI ban pynbha ia kane ka surok, kipaidbah ki kynnoh ka dei jing bym ler jong kine ki ar tylli ki bor kbia dei peit ia kane ka surok.
Ka jingiaid jong ki kali na kane ka surok ka long kaba bun bha namar ka pyniasoh ia kiwei ki jylla kum ka jylla Tripura, Mizoram bad ki bynta ba sharum jong ka jylla Assam. Kiba leit ba wan na kane ka surok ki shem shitom shisha namar ba ka surok ka la sniew palat haduh ba ym lah ban ong ba ka dei ka surok bah National High Way.(SP News)
