Shillong, Naiwieng 13: U President ka KSU u Samla Daniel Khyriem ula ong ba jingkren u Bah Prestone Tynsong ba ka ka Meghalaya Regulation and Verification of Tenants Bill 2013 kadei ka ain kaba lah ban tehlakam ia ki bar jylla bad ki mynder kane ka jingkren ka long kaba bakla bad kaba bym iahap satia namar ngi lah dep iohi lypa ba kane ka ain da lei lei kam lah ban tehlakam ia ka jingwan ki nongwei bad dei tang ka Inner Line Permit kaba lah ban tehlakam ia ka jingwan rung laitlan ki Mynder bad ki bar jylla.
uno uno u briew uba wanrung sha ka jylla jong ngi shisien ba la pyntreikam ia ka ILP u hap ban don ia ki kot ki sla kiba biang bad lada u rung kumto khlem ki kot ki sla lada lap ia u hap ban pynngat ha ki jingpynsajia katkum ki ain ryngkat bad ka dain kuna namar ka jingpynkhein ia ki kyndon ain.
Na ka liang ki 14 seng ki kyntu ia u Bah Prestone Tynsong ban kren ia u Myntri Rangbah bad ia ki MLA kiba don ha ka sorkar ba kidei ban pyntreikam noh mardor ia ka Eastern Bengal Frontier Regulation Act 1873 bad ngi shem ba dei tang lyngba kane ka ain kaba khlain kaba don ki bniat ban dait ym kum ka Meghalaya Regulation and Verification of Tenants Bill 2013 ka bym don satia ki bniat kiba nep bad kane ka ain kaba wanrah da ka sorkar kadei kaba khlem bniat.
Halor ka jingdawa jong ki sengbhalang ban pyntreikam noh ia ka ILP, ka sorkar hi mynshem snem kala thaw ia ka High Level Committee on Influx kaba la khliehduh da u Symbud Myntri Rangbah barim ka jylla u bah BM Lanong ha kaba la iadonbyntalang ki Myntri Sorkar kiba dei ki MLA Congress, ki CEM jong ki 3 tylli ki Autonomous District Council, ki riewpawkhmat,ki Syiem, Rangbah Shnong ryngkat ki nongialam Sengbhalang bad ha kane ka Committee la iatai sani bad da kawei ka sur ki dkhot kiba iadonbynta kila mynjur ban kyrshan ban pyntreikam ia ka ILP hynrei hadien ka election kine ki MLA kila kylla jutang bad kim shym la kren eiei halor kane ka issue bad kila don ruh kiba shu sngap jar jar.
Ka jingwanrah ka sorkar jylla ia ka Meghalaya Regulation and Verification of Tenants Bill 2013 kadei tang ka buit ban tap eitmiaw noh ia ka rai jong ka High Level Committee on Influx kaba la mynjur bad kaba la dep phah sha ka sorkar ban pyntreikam noh ia ka ILP ha ka jylla jong ngi. Kaba sngew lyngngoh ka long ba ka sorkar ka kwah ia ngi ban iadonbynta sa ha kawei ka committee lyngba ka jingkhot u bah Prestone Tynsong, hynrei wat tang ia ka rai jong ka High Level Committee kam shym la khein snep bad sa katno tylli ki committee ka sorkar ka kwah ban pynmih nangne shakhmat. Ngi dawa na ka sorkar ban pyntreikam noh ia ka ILP ym ban thaw ia ki committee ban iashong Committee shi Committee kaei ka jingthmu jong ka sorkar halor kane hato kan shu kut tang ha ka thaw Committee ka jingbteng ka sorkar ban thaw Committee kadei tang ka Buit ne ka Delay Tactic jong ka sorkar ban pynjah klep ia ka issue kaba ki sengbhalang ki dawa na ka sorkar ban wanrah ia ka shongsuk shongshngain jong ki paid ka jylla hi baroh kawei.
Ha ka HLC ki MLA Congress kiba dei ki Myntri sorkar kila iadonbyntalang ha kaban rai bad ha katei ka por kim shym la ai jingmut satia ban wanrah da ka Meghalaya Regulation and Verification of Tenants Bill 2013 hynrei kynsan kynsan ki kyrshan beit ia ka ILP bad kynsan kynsan hadien ka election ki nguid noh ia la ka rai, kane ka pawshai ba kim long Serious ia ka issue jong ka Influx.
Haba ngi peit ha Nagaland, Mizoram bad Arunachal Pradesh kaba pyntreikam ia ka ILP kam don kano kano ka jingeh bad kam shym la khanglad satia ia ka development, Tourism ne kiwei kiwei hynrei ki iaid beit iaid ryntih bad ka ILP ka khanglad ia ka jingwan rung beaiñ ki Mynder bad ki bar jylla kiba thmu ban buhai shnong ha kitei ki jylla bad ngi iohi ruh ba ha kine ki 3 tylli ki jylla ka Central Govt kala pyrshang ban weng noh ia ka ILP hynrei ki sorkar kine ki jylla khamtam ha Mizoram bad Arunachal kiba dei kiba la synshar da ka Congress ki pyrshah jur ban weng ia kane ka ain namar ki sngewthuh shai ba ki trai muluk ki shongshngain ha ka jylla lyngba ka jingdon ka ILP kaba iada ia ki trai muluk kiba don ha kitei ki jylla.
Ngi la iohi ruh ba ka jylla Tripura kaba ki trai muluk kila kylla rit paid hala ka jong ka ri ha kaba kim don bor shuh ha ka khaii ka pateng bad kila synjor ha ka synshar khaddar ha kaba kila shah tyllep ha ki briew kiba wan na shabar kiba la knieh lut nadong shading bad wat ha Assam ruh ki nong Bangladesh kila knieh lut ia ki jaka ki puta bad la iohi ruh ba ki nong Bangladesh kiba don ha Assam kila sdang don bor bad suhkhlieh wat ha ki kam synshar khaddar ne politics
Haba ngi phai sha Manipur, dei ka sorkar Manipur hi kaba la pdiang ban pyntreikam ia ka ILP ha katei ka jylla hynrei balei pat ka sorkar Meghalaya kam lah ban leh kam myntoi shuh ban iakren ILP ynda ka por kala dier hynrei ngi dawa mynta ia ka sorkar ban pyntreikam noh ia ka ILP namar ba ngi donkam kyrkieh ia ka ILP kaba long ka lad jingiada ia u trai ri trai muluk ha kane ka jylla jong ngi bad ngi iai ban ba ka sorkar kadei ban pyntreikam noh mardor ia ka Eastern Bengal Frontier Regulation Act 1873 ba dei tang kane ka ain kaba lah ban tehlakam ia ka jingwan rung beaiñ ki mynder bad bar jylla bad kaba iaid a ia ka riti dustur, ka khyndew ka shyiap bad ia ka synshar khaddar.
hakajuh ka por ngi kyrpad ia ki Dorbar Shnong ha kylleng ka Bri u Hynniewtrep ba kum ki Sengbhalang ki iai dawa na ka por sha ka por ba ia ki Dorbar Shnong dei ban ithuh bad pynkup bor shuh shuh ia ki kum ki atiar ba khlain ha kaban peitngor lem ha ka imlang sahlang bad ban peitngor lem ia ka jingwan rung kyrthep ki nongwei, kaei kaba ngi kwah ban ong ia ki Dorbar Shnong ka long ba kim dei ban shu tare ruma ia kaei kaba ka sorkar ka tyrwa namar kidei ban sngewthuh shai ba kane ka Bill kaba ka sorkar ka tyrwa mynta kadei shi bynta na ka bynta ban pynsynjor noh bad ban iuhroit ia ka iktiar jong ki Dorbar Shnong kiba la don baroh shi katta bad ngi kyntu ruh ia ki Dorbar Shnong ba shwa ba kin tare kin bishar bha namar ioh lehse kane ka jingtyrwa ka sorkar da kane ka Bill ka long shi bynta ban tih liewlep ia ki atiar kiba ka Dorbar Shnong ki paidbah kila pynkup bor bad kaba baroh ki niewkor ia ki Dorbar Shnong ha baroh kawei ka bri u Hynniewtrep.
Ngi ai khublei kyrpang ia ki Dorbar Shnong, ki riewpaidbah kiba don ia ka jingsngewkhia kiba ieng hakajuh ka nongrim ban pynbor ia ka sorkar ban pyntreikam noh ia ka ILP ngi phah ruh ia ka jingkyrkhu kyrdoh ba kin nang shait nang khlain bad ba u Blei un nang da nang ker ia ki bad ia baroh ki paidbah ka jylla kiba la kyrshan met bad mynsiem ia ka jingiakhih ki sengbhalang ban dawa pyntreikam ia ka ILP, ngi khmih lynti ba ki paidbah da kawei ka jingmut bad da ka jingiatylli kin dang kyrshan radbah nangne shakhmat namar ngi sngewthuh ba ka jingdawa ia ka ilp kam dei ka issue jong ki sengbhalang hynrei kadei ka mat jong ka jylla hi baroh kawei, kumta ngi kyrpad ia ki paidbah ba kim dei ban shah ialam bakla ha ki katto katne ne ha kita ki “Agent” jong ka sorkar hynrei kidei ban sngewthuh ba ka ILP hi ka long ka mat kaba donkam haduh katta katta hapoh ka jylla jong ngi. Kane ka dei ka kyrwoh kaba la phah da u president ka KSU u Bah Daniel Khyriem. (SP News)
