Balei kem ia ka kong Agnes kem ia ngi ki trai kam, bteng ka jingiakhih

Shillong Naiwieng 13: Hynne ka sngi, kumba 30 ngut ei ei ki longkmei khamtam, ki la shong kyrain hynnin hakhmat SP ophis bad ki la bteng biang hynne ha Khyndai Lad. Ia kine ki trai iing ba la shah pynpra ia ki iing ha Umsawli, Mawtari-Mawlong, la synran ki seng bhalang bapher bapher, ki riew rangbah Morningstar Sumer, Pastor Kyrsoibor Pyrtuh bad kiwei kiba wan shong kyrain lang ban pynpaw pyrshah ia ka jingleh ka
sorkar ban pynpra ia ki iing jongki bad ruh, ban dawa pynlait mardor ia ka presideng ka CSWO ka Kong Agnes Kharshiing.

Kine ki nongshong kyrain, ki la sdang ha ka por mynsngi bad ki la rai ban shong haduh ban da miet lada ka sorkar kam tuklar ban pynbeit ia kane ka kam. La iohi ba ha kane ka jingshong kyrain, la  don ki longkmie ba wanrah da kaba bah lang ia I khun. Iwei na kine, dei Ikong Philemon Lyngdoh ba la shah pynpra ia la iing bad I la wan ban shong kyrain lang bad la I khun ba dang rit.

“ngin sa ia peit, ngi lah ban iashong haduh ban da miet ne baroh shi miet bad kin bteng beit ban iakhih lada ka sorkar kam sngap ia ka jingdawa jongki ia ka jingshah knieh ia ka jaka ka iing ka sem bad ban pynlait ia ka Kong Agnes”, la ong ka Kong Angela Rangad haba kren hynne. Ki briew kiba shah pynpra ia ki iing ki sem ha ka MUDA ki la kynthah
jur ia ka sorkar kaba kem ia ka Kong Agnes Kharshiing haba kadei tang ka nongiarap ia ki nongshah pynpra iing.

Ka Kong Theirit Lyngdoh kawei na ki trai jaka ba shah pynpra iing ka la ong ba ka jingkem jong ka sorkar ia ka Kong Agnes ka long kaba khlem nongrim namar ka Kong Agnes kadei tang ka nongiarap ia ngi ki bym tip ia u A u B, ha ka jingshisha ka sorkar ka la dei ban kem ia ngi ki trai iing trai jaka.

“kem ia ngi ki trai jaka balei ban kem ia ka Kong Agnes kaba dei tang ka nongiarap ia ngi”, la ong ka Kong Lyngdoh haba kren hynne ha jaka ba ki shong kyrain ha Khyndailad.(SP News)