Shillong, Naiwieng 23: Haba iohi ia ka jingeh jong ki paidbah jong kane ka Ri India na ka bynta jong kito kiba shong ba sah haki thain khappud bad kiwei ki ri jong ka pyrthei na ka liang jong ka Forum for Integrated National Security (FINS) ka la pynlong ia ka jingpyrta suwangka ha kylleng saw dong jong ka Ri India ban ong ia ka sorkar India bad ia ki sorkar jylla ba dei ban peit ia ka jingeh ha ka liang ka ioh kami oh jam bad kiwei dei ki kam pynroi.
Haba kren ha ki nongthoh khubor U nongialam jong ka seng U Seshadri Chari u la ong ba kumba ka long mynta ki shiphew hajar ngut ki dkhot jong ka seng ki ki 646 tylli ki district jong ka Ri India ki la leit ban jngoh ia ki 149 tylli ki kad ha ki khappud bad kiwei ki ri jong ka pyrthei ha Meghalaya ki la lah ban leh tang 11 tylli ha duh mynta.
Ha kane ka jingleit ka jong ki haba ia kren bad ki briew ki shem ba ka jyllei bha ki kam khaii beain bad ka jingwanrung jong ki briew na kiwei ki ri sha kane ka Ri India. Kane ka jinglaitlan jong ki briew ban rung ka wanrah ia ka jingdon jong ki seng lehnoh kiba long ki nongpynwit ia ka imlang sah lang ha ka Ri bad ka jylla.
Kane ka kynhun kan sa ai ia ka kaiphot jong ki sha ka sorkar pdeng bad sha ki sorkar jylla ban leh ia kaba don kam na ka bynta ban kyntiew ia ka roi ka par jong kito ki jaka namar ka long kaba don kam ban pynpoi ia ki kam pynroi wat sha ki nongkyndong. Ka jingsah dien jong ki jaka kiba don ha khappud bad kiwei ki ri ka long kaba la palat.
Na ka liang jong ka FINS ka iohi ba lada ymdon ka lynti rel kan long kaba eh ban kiew ha ka ioh ka kot namar dei da kane ka lad ba lada ka don ka lynti rel kan suk ha ka leit ka wan bad ka kit ka bhah bad ka jingkiew jong ka ioh ka kot ruh kan kloi. Na ka liang jong kane ka kynhun ka buh ka jingkylli balei ym ban don ia ka lynti rel ban suk ka leit ka wan?.(SP News
