Shillong, Naiwieng 13: Na ka daw jong ka jingjyllei palat ki kam lehnoh ha GaroHills ka cabinet ha ka jingialang kaba la long mynta ka sngi ka la shim ia ka rai ba kan thaw noh da ka “special multi task force” ban ia khun pyrshah ia ki kam lehnoh ha Garo Hills.
Ia kane ka kam la aiti ha u Chief Secretary ka jylla ba yn pynwan dur ia ka. Kane ka long ka kynhun pulit kaba khlain kaba lah ban ia khun pyrshah ia ki kam lehnoh ha katei ka thain Garo Hills bad ha ka jylla baroh kawei.
U myntri rangbah u la ong ba ka long kaba don kam kykrieh ban pynkhlian ia ka jingtrei kam jong ki pulit na ka bynta ban ia khun pyrshah ia ki lehnoh bad kumba ka long mynta ka jylla ka shaniah tang ha ki kynhun shipai kiba la ai da ka sorkar pdeng.
Ka long kaba don kam ba ka sorkar kan hap ban pynlut ha kaba pynkhlain ia ka tand pulit ha ka jylla na ka daw jong ka jinglong ka shong suk shong sain ha ka jylla kumba ka long mynta bad don kam ban khlain ka jingtrei kam. Kane ka rai ka la mih ha dien ba ka sorkar jylla kam shym la ioh ia ka jingdon kam pulit kumba ka pan.
U myntri rangbah u la ong ba ka sorkar jylla ka juh pan ia ka jingdon kam pulit na ka tnad kam poh iing jogn ka sorkar pdeng bad bun sien na ka daw jong ki jingjia kiba ym lah ban iohi lypa ka sorkar pdeng kam juh ai ia kaei kaba ka jylla ka pan.
Ha kane ka liang hap ban ia treilang ha pdeng ka sorkar jylla bad ka sorkar pdeng ban wad ia ki lad ki lynti kumno ban ia khun pyrshah ia ki lehnoh, kumba ka long mynta ki lehnoh ki ioh ia ki tiar kiba khlian bor na ka daw jong ka jingdon jong kine kitiar ha ki iew ki hat jong kiwei ki Ri. (SP News)
