Shillong, Naiwieng 30: Ka jingpynmareh ia ki samla kiba kwah ban rung sha ka kam pulit ka dang iaid mynta ha Mawiong bad ha Tura. Ha kane ka jingpyniamareh na ka liang jong ka tnad pulit ka la buh ia ka kyndon ba kiba wan sha kane ka jingiamareh ka jingtrong jong ki katei ban long 157 CM iaki shynrang bad 152 Cm ia ki kynthei.
Haba kren ha u SP News Agency na ka liang jong u DSP headquarter u la iathuh ba na ka liang jong ka tnad pulit ka la buh ia ki kyndon kiba shai kdar ba ki samla kiba don ia ka jingjrong kaba 157 cm na ka bynta jong ki shynrang ki lah ban iamareh na ka bynta kane ka kam pulit bad na ka bynta ki kynthei ki dei ban jrong 152 cm. Kiba duna na katei ka jingthew ym lah ban pdiang. Na ka bynta ki bym dei ki riewlum pat ka jingjrong jong ki ka dei ban long 162 cm.
La iathuh ba na ka liang jong ka tnad pulit mynta ka la pyndon kam da ki kor computer ban thew ia ka rynieng jong ki briew bad lada ka lynieng ka duna kim lah ban pdiang. Kiba palat ia katei ka jingthew baroh kiba la poi sha katei ka jaka kin ioh ia lad ban ia mareh kumba la buh.
Haba jubab ia ki jingkylli na ka liang jong u DSP headquarter u la ong ba ka dei ka jingshisha ha ki ar lai sngi ba ka dang sdang ka jingiamareh la pynlong haduh khatwei baje mynmiet ruh namar ym lah ban pyndep tang ha ka por sngi namar ha ka juh ka sngi la pynmareh haduh 1200 bad 1300 ngut.
Halor ka jingong ba don kiba shah kyntait, la ong ba ka jingshah kyntait ka dei beit tang namar ba kim kot ka jingjrong jong ki katkum kitei ki kyndon kiba la buh haneng. La iathuh ba haduh mynta ka jingpyniaid ia kane ka jingiamareh kala iaid beit bad kiba shah weng naka jingiamareh dei ba ki duna ha ka jingjrong ka rynieng.(SP News)
