Shillong Risaw 31,: Ki Myntri ba dei peit ia ki marbam mardih na ki jylla bapaher bapher jong ka ri, kin ia kynduh ha ka nongbah New Delhi mynta ka sngi. Ka jingthmu jong kane ka jingiakynduh lang ka long ba ia phyrkhat lang kumno ban pynkhlain shuh shuh ia ia ka rukom sam ia ki marbam ha baroh ki jylla jong ka ri India bad kum juh ruh ia ki dukan ai rashon.
Ym tang katta, ha kane ka jingiakynduh lang, yn ia pyrkhad ruh kumno ban shim ia kiwei ki lad ki lynti ha kaba ym lah ban pynpoi ia ki mar bam sha ki long iing lyngba ki dukan rashon kynthup ruh ia ka ai shiteng dor ne subsidy sha ki nongbam.
Ia kane ka jingiakynlang yn pyniaid da u Myntri ki kam marbam mardih jong ka tnad Sorkar Kmie, u Prof. K.V. Thomas. Ha kane ka jingialang la khmih lynti ia ka jingiadon lang jong baroh ki Myntri jong jylla kiba dei peit ia ki marbam mardih, ki heh Sorkar kiba dei peit ia ka rep ka riang, ki marbam bad ka Planning Commission
Ka Sorkar Kmie ka la dep pynkheh ia ka jingsam ia ki marbam da kaba pyndonkam ia ki kor ki bor Komputor. Ha kaba ia dei ba kane, la kyntu ia ki jylla ban pynkhreh noh ia ki jingtrei kam lyngba ki kor ki bor Computor ha kaba ia dei bad ka jingsam ia ki marbam mardih. Ban pynurlong ia ka jingtrei kam kaba thymmai, ka Sorkar Kmie ki la dep mang haduh 84.07 klur tyngka na ka bynta kane ka jingthmu
Nalor ka jingpynioh ia ki Ration Card da ka jingtrei kam ki kor ki bor Komputor, ka don ruh ia ka jingpyntip sha ki nongshim rashon lyngba ki SMS. Ka la don ka jingpyntrei kam ia kane ka jingthmu ha ki katto katne tylli ki jylla hapoh ka ri. Hynrei, na ka bynta ka jingpyntrei kam ha baroh ki jylla jong ka ri India, yn sa iakren ha katei ka jingialang.
Ha katei ka jingialang, yn ioh ruh ban iakren halor ka jingtheid ia ki marbam na ki nongrep bad ka jingsiew biang por ruh na ka bynta jong ki. Ha kaba ia dei bad kane ka phang, la khmih lynti ruh ba ki jylla ba kin ai jingkhein lyngba ki kor komputor ia kata ka jingsei shini jong ki bad kum ruh ia ka jingdonkam khaw. (SP News)
