Shillong, Jylliew 10: Ka sorkar Meghalaya ka la aiti sha ka National Institute of Public Finance and Policy, (NIPFP) ba kan pynkreh ia ka “Vision document for the state of Meghalaya 2030”. Kane ka report ka don haduh 209 sla.
Ka National Institute of Public Finance and Policy (NIPFP) ka la shimti ban leh ia kane ka kam bah kam san ha u snem 2011 bad mynta ka la dep phah sha ka sorkar jylla ia ka kaiphot ka jong ka bad ka shong ha ka sorkar jylla ban pdiang ne kyntait ia ka. Ia kane ka Vision document la buh ha ka website jong ka planning department.
Ka kynhun kaba pynkhreh ia kane ka kaiphiot ki don hynriew ngut bad kita ki long u M. Govinda Rao, Chandan Mukherjee, Anuradha Bhasin, Alokesh Barua, Mukesh Anand, Rita Pandey bad u R. Srinivasan na ka National Institute of Public Finance and Policy. Kane ka vision document mynta ka don bad ka sorkar jylla.
Kane ka kynhun ha kaba pynkhreh ia kane ka vision document 2030, ka la kdew ban kyntiew ia ka ioh ka kot ha kane ka jylla don kam ia ka jingiatreilang jong ki paidbah bad ka sorkar pdeng ka dei ban wan sha khmat ban iarap ha kiba bun ki liang namar ka jylla Meghalaya ka hap ha ka kyrdan ba kyrpang ia kaba la tip kum ka “ Special Category State”.
Ki thymmei khubor ki iathuh ha u SP News Agency ba ia kane ka Vision document 2030 ka cabinet kam pat pdiang ban pyntrei kam ia ka, ka daw ka long ba ki dang don ki jingpynbeit ha kane ka kaiphot kaba la phah da ka NIPFP. Ban pyntrei kam ia kane ba kan long ka nongkdew lynti ia ka sorkar kashong mynta ha ka Cabinet ban pdiang ne kytait ia ka.(SP News)
