Shillong, Iaiong 25: Ka Co-Ordination Committee on International Border (CCIB) mynta ka sngi ka la phah da ka Memoradum sha u myntri kam bar ri jong ka Ri India u Salman Khursheed ban pynpaw ia ka jingpyrshah ia ka jingkwah ka sorkar pdeng ban ai ia ki jaka kiba don ha Meghalaya sha ka Ri Bangladesh khlem da jurip bha ia ki jaka puta kumba dei ban long.
Ha kane ka memorandum kaba la phah mynta ka sngi sha ka sorkar pdeng na ka liang jong ka CCIB ka la ong ba ka jingiasoi soskular hapdeng ka India bad ka Bangladesh ban ia ai ia shim ia ki jaka kiba don hapdeng ka jingiakajia hapdeng kine ki ar tylli ki ri ia kaba ym pat lah ban pynbeit haduh kine ki sngi kan wanrah ia ka jingduh ia ki jaka puta jong ka jylla Meghalaya lada ka iing dorbar jong ka Ri India ka pdiang ia kaei kaba la dep ban ia soi.
Na ka liang jong ka seng ka ong ba lada ia kane ka ain ban pynskhem da ka Ri India hapoh parliament kan long ka jingduh kaba khraw ia ka jylla Meghalaya bad ia ka Ri India hi baroh kawei bad kaei kaba ka seng ka sngewkhia jur ka long ba ia ki briew jong kane ka jylla Meghalaya sha ei ym buh iaki.
Na ka liang jong ka CCIB ka la kyntu ia u myntri ka sorkar pdeng ba ia kane ka bill “The Constitution (One hundred and Nineteenth Amendment) Bill 2013 kaba la wan rah hapoh parliament dei ban buh teng shuwa haduh ban da dep ban pynbeit janai ia ki jaka puta. (SP News)
