Shillong, Risaw 11: ka jylla Meghalaya mynta ka sngi ka la jam sa u wei u mawmer ha kaba u myntri rangbah ka jylla u Dr Mukul Sangma u la plie ia ka e-CST services na ka bynta ban pyniaid beit ia ka rukom lum khajana ha ka jylla bad ban pynsuk ia ki nongkhaii ha kaba siew ia ka khajana.
Da ka jingdon ia kane ka e-CST project kan pynduh noh ia ka rukom ai ia ka certificate Central Sale Tax ia kaba la tip kum ka Form.C, Form.E-I, Form E-II , Form F bad ia ka Form-H. Ha kine ki sngi kiba la dep ia kitei ki phom la ai da ka kot, hynrei mynta lah ban phah da ki kor ki bor electronic katkum ki kyndon hapoh jong ka ain CST Act.
Ka sorkar kan sa buh ia ka jinglum thup kaba thikna ha kaba ia dei bad ki nongkhaii kiba ia khaii pateng bad kiwei ki bynta jong ka Ri India ia kaba la tip kum ka Inter state trade bad ia kitei ki form lah ban ai online khlem da don shuh kano kano ka jingwit bad na ka bynta ki nongkhaii kan don ka jingai da ki number kiba kyrpang ban tip ia ka numbr jong ki ha kaba ai ia ki form-C.
Kane kan iarap shibun ban bud dien ia ka khaii pateng bad ban lum khajana . Ha ka jingkren jong u Dr Mukul Sangma myntri rangbah ka jylla u la ong ba kane kan long ka jingiarap kaba khraw ia ka jylla bad ha ka juh ka por ban iarap ia ki nongkhaii ban suk ha kaba sniew ia ka khajna ka jong ki.
Ha kane ka sngi ki heh sorkar kiba la don lang ki long u Commissioner bad Secretary jong ka tand lum khajana jong ka sorkar u Bah J Lyngdoh u Commisisoner Taxation u Abhishek Bhagotia, ha kane ka sngi la don ruh bun kiwei kiwei ki heh sorkar ban ia sakhi lang ia kane ka sngi.(SP News)
