Shillong, Naitung 25: Lai ngut ki MLA jong ka jylla Assam, u Rekibudin Ahamed parliamentary Secretary ia kaba la synran lang da u MLA jong ka Mangkachar Javed Islam bad u MLA jong ka Golagang Abu Taher Berpari ki la ia kynduh ia u myntri rangbah ka jylla u Dr Mukul Sangma mynta ka sngi ha iing jong u.
Kane ka jingwan ia kynduh jong ki ia u Dr Mukul Ka long ban wad ki lad ki lynti kumno ban wanrah ia ka jingshong suk ha khappud ka jylla Meghalaya bad Assam kaba la mih ki jingeh ha kine ki sngi.
U Dr Mukul Sangma u la iathuh ha ki nongthoh khubor ba ka jingshong suk shongsainha khappud Meghalaya bad ka jylla Assam ka long kaba don kam namar ka jingsuk ka la wan biang mynta bad kaba don kam ka long ba ki briew kihap ban don ka jingiasngew jan iwei ia iwei.
Haba ia dei bad ka kam pud kam sam u la ong ba u la dep ban ia kren bad u Chief Minister ka jylla Assam Tarun Gogoi ban ia pynbeit ia ka jingiakren ha pdeng ki ar ngut ki Chief Secretary jong ki ar jylla. Na ka liang jong ka sorkar Meghalaya ka la long kaba la kloi ban ia kren.
Na ka liang jong ka sorkar Meghalaya ka la dep ban ai ia ki kot ki sla sha ka sorkar Assam ban pyni ia ki jaka kiba ka kam bad kaba don kam mynta ka long ban bteng ia ki jingiakren ha kaba yn lah ban ia pynbeit ia u pud u sam da ka jingiasngewthuh jingmud.
Kane ka jingeh ha kaba ia dei bad u pud u sam ka dei kaba la slem bad na ka liang jong ka sorkar ruh ka dang ia leh katba lah ban pynbeit ia kane ka jingeh ha ka rukom kaba jia jai khlem da don kano kano ka jingktah.
Na ka liang jong ka sorkar Meghalaya ka la dep ban pynbiang ia ki kot ki sla bad ka shong mynta ban ia bisahr bniah ban iapeit ia kaei kaba ka jylla Assam ruh ka don ban ong. U myntri rangbah u don ka jingkyrmen ba ia kane ka kam lah ban pynbeit da ka jingiasngewthuh jingmud lang.(SP News)
