Jowai, Nohprah 13: Ka Jaintia Youth Federation JYF Central Body hadien ba ka la iohshibun ki jingujor na baroh ki Regional Body, Circle Body, Unit Body
jong ka Seng ba ki la duh ka jingshaniah ia ka jinglong nongkit kamjong u Ex Publicity & Information Secretary (Mr. Prowell P Phawa) baki shait ioh phon na u man ka por ba u kwah ban pynpait pynpra ia kaSeng da ka ba kynnoh laiphew jait ia ki nongkitkam ba ha khmat duhjong ka Seng da ka ba thmu ban pynjah burom ia ki khlem kino kino kidaw kiba dei ki khana ba shu thaw hi da ma u tang ban pynbiej ia kidkhot ban ioh pynjot pynpra ia ka jinglong kawei hapoh ka Seng JYF.
Ha ka jingshisha ka JYF ka lah dep weng kam (Suspended) ia u ExPublicity & Information Secretary (Mr. Prowell P Phawa) namar kajingiaid lait jong u ia ki kyndon treikam (Undisipline) jong ka Seng, hynrei hadien katto katne bnai pat na ka liang ka Disciplinary Committee (DC) ka pdiang ia ka jingpanmap jong u kum u briew ka shait don hi ka jingbakla da ka ba pyrkhat ba un sa kylla ka bamut.Markhongpong ka nangjur pynban ka jingialeh pyrshah Seng bad sngewmeng sngewkhraw ialade da kaba ibein ipoh ia ki dkhot jong ka Seng ba ia u yn ym don ba nud ban pynshitom namar u kam ialade ba u dei u nongpynkiew ia ka JYF ha ka rukom treikam.
Na ka liang jong ki nong shnong Lakadong Ummat ruh ki la iathuh ha ka Seng ba ha ka por ba long Secretary VEC u Prowell P Phawa u bamklop ia ka skim 100 sngi kaba dei ka bainong jong ki paitbah kiba ia trei shitrhem bha ha ka to ka por ban pynbha pynmiat ia ka shnong ka thaw lyngba ka Skim MGNREGS, kat haduh ba mih ka jinghuri hura hapoh shnong bad hadien pat ki paitbah ki ia sngewthuh noh bad u.
Kumjuh ruh ka Seng na ka por sha ka por ka shait ioh jingujor na ki trai shnong jong u na Lakadong Ummat ba u dei u briew ba im sngi tang ha ki kam ban mushlia ia ki kam shnong kam thaw da ka ba byrngem byrsit ia ki ba u dei u nongialam Sengbhalang kim lah ban leh ei ei pyrshah ia u, wat la ki mut ban ujor pyrshah ia ka jingbym wan tikna jong u sha skul kum u nonghikai (SSA) kim ju nud namar ki sheptieng ia u ioh ba u leh ei ei ia ki katba ia ka tulop pat u leit draw thik thik iathuh ki nongshong shnong na Lakadong Ummat.
Ka jinglap ksai jong ki nongialam ka JYF ia ka jingthmu jong u Prowell P Phawa ban ialam bakla ia ki dkhot jong ka Seng ka long ka jingkyrkhu kaba khraw, namar mynta sop sop u dang suit dang shor bha ia ka Seng thymmai jong u ka Ri Jaintia Youth Federation (RJYF) ka ban ialam bakla pat sa ia ki paitbah kiba la ngiah ia ka jingbun tang ki Seng tit ha Ri lum Jaintia katba ki nongialam pat ki dei ki juh hi (Same Motive) kiba la shah beh shah kyntait ha ki Seng ba ki ju don, namar ka rukom treikam (Ideology) ne ka thong jong ki ka dei tang ban myntoi ialade ym ban shakri ia ka Ri bad ka Jaitbynriew.
Kumta na ka liang ka JYF ka pynbna ba naduh mynta ka sngi ba ia u Ex Publicity & Information Secretary (Mr. Prowell P Phawa) ka Seng ka la weng kam bad beh noh shisyndon ia u naduh ka jinglong dkhot hapoh jong ka JYF kaban treikam naduh mynta ka sngi bad ka tarik 13th-12-2013, namar kum kine ki jait briew kiba shim kabu ban rieh tngen hapoh ki Sengbhalang ban pynbiej ia kiba lui lui ki bym don jingnang jingtip kan thaw jingeh shuh shuh ia ka Seng.(SP News)
