Shillong, Kyllalyngkot 05: Ka Khasi Student’sUnion (KSU) kala pynpaw ia ka jingpyrshah kaba jur halor ka rai jong ka sorkar jylla ban pynjlan shuh shuh ia ka por shongthait jong u Chief Secetary ka jylla u bah WMS Pariat sa kumba 6 bnai.
U General Secretary ka Khasi Student’sUnion (KSU)u samla Auguster Jyrwa ula ong “Wei ba ka ia kala kut ban shongthait ym donkam ban pynjlan ia ka por shongthait namar ba ki dang bun kiwei pat ki ophisar sorkar kiba lah ban shimti ia katei ka kam. Ka jingpynjlan ka long pynban ka jingkhalanglad ia kiwei pat ki ophisar sorkar kiban shimti ia katei ka kam namar ba ka seng ka ju ieng hi barabor lada dei iano iano ruh wei ba la kut ka por dei ban shongthait bad ka seng ka pyrshah jur ban pynjlan por biang ia uno uno u heh ophisar ban bteng biang ia ka kam kaba u bat”.
Kumta na ka liang ka seng ngi sngew ban, banjur ba ka seng ka pyrshah jur halor ka rai jong ka sorkar ban dang pynjlan shuh shuh ia ka por treikam u Chief Secretary bad ka seng ka kwah ban buh jingkylli ia ka sorkar ka long “Hato ka sorkar kam don mo ia kiwei pat ki ophisar kiba lah ban shimti ia kane ka kam lane ioh lehse ka don eiei sha lyndet halor kane ka jingpynjlan ia ka por shongthait u Chief Secretary?.
Kumba ka seng ka ieng ha ka nongrim naduh ki por ba mynshwa halor ka jingpynjlan ia ka por shongthait jong kito ki ophisar kiba la dei ban shongthait bad haduh kane ka khyllipmat kaba mynta ruh ka seng ka pyrshah jur ia ka rai jong ka sorkar bad ka sorkar kam dei ban pynjlan shuh shuh ia ka por shongthait hynrei ka dei ban ai ba uba la dei ban shongthait u dei ban shongthait noh katba ia ka shuki thylli dei ban aiti ha ki ophisar kiba tbit ban shimti ia ka kam namar kam mut ba kiban shimti kim dei satia kiba tbit hynrei ki lah ban long kiba kham tbit shuh shuh ban treikam ban ai ia ka jingshakri kaba paka sha ka jylla hi baroh kawei.
Ka KSU kala kyntu ruh ia kiba don ha ka kam ba shi sien ba la kut ka por kidei ban shongthait beit ym ba kin shimti ne bteng biang ia ka kam khnang ba kan ailad pat ia kiwei ban shimti ban pynpaw iala ka jingtbit ha ka jingtreikam namar ba ki dang don shibun ki ophisar kiba lah ban shimti ia kane ka kam.(SP News)
