Shillong, Kyllalyngkot 31:Ka seng Ri Umsnam People Aliance (RUPA) sengkmie ka sngewkhia jur halor ka jingpynduh kam ia ki 246 ngut ki nonghikai namar ka jingthung kam sop sop da ki Nongmihkhmat ne ki ophisar, kaba la pynlehrain ia ka Sorkar Jylla hi bad khamtam eh ia kitei ki nonghikai.
Katkum ba la paw ha ki Kot Khubor kitei ki Nonghikai kiba shah pynduh la thung ha ka por ba ka Kong Ampareen Lyngdoh, Myntri kam pynroi sor ka sorkar Jylla ka dang bat kum ka Myntri ka tnad pule puthi ka Sorkar Jylla ha u snem 2010-11.
“Kane ka la pyrthei hadien ba la ujor da ki sengbhalang sha ka CBI ba ka don ka jingthung kam sop sop da ki Nongmihkhmat da kaba pyndam sialieh ban pynduh ia ka hok jong kiwei kiba dei hok ban ioh,” ong u Bah E.B Lyngdoh, Publicity Secretary, Information Cell ka RUPA.
Hynrei kaba lyngngoh ka long ba kitei ki nonghikai kiba shah pynduhkam ki paw tang na ki katto katne ki jaka, kata na Jowai 92 ngut, Shillong-53, Dadengre-43, Amlarem-37 bad na Tura-21 ngut, Balei ym shym la paw kyrteng ha kiwei de ki district ?, la buh jingkylli u Bah Lyngdoh bad bynrap ba kane ka long ka jingma ia ki samla kiba wad kam sorkar ba kin long kiba husiar haba ki wad kam sorkar, ioh kin shah pynduh noh shibit por.
Halor kane ka bynta, ka RUPA ka sngewdei ban ai ka jingkyrshan ia ka jingdawa jong ka seng UDP bad ka kyntu ruh ia ka sorkar ba ka dei ban pynmih ia ki kyrteng jong kito ki nonghikai kiba shah pynduhkam bad kumjuh ia kito ban thung thymmai ha ki Kot Khubor, khnang ba kan long kaba khuid bashai. “Namar ioh kan long pynban ka kabu ia kiwei kiba kwah ban kamai spah da kaba thungkam thungjam ha ki tnad treikam ka Sorkar Jylla” ula bynrap. (SP News)
