Shillong, Jymmang 28 : Hadien ba ka Meghalaya Electricity Corporation Limited (MeECL) ka la pyllait shipor na ka jingpynlip bor ding hynrei mynta la pyntrei biang khlem kano kano ka jingpyntip kaba thikna sha ki paidbah, kiba bun ba lang ki tip ia kane bad kim tip ia ka por pynlip bor ding jong ka MeECL.
Ka daw ba ki paidbah ki kulmar jingmut ka dei ba don ki por ba ka MeECL ka pynlip kat kum ki kynta jong ki jingpynbna ba mynshwa jong ka bad don pat ki por ba ka pynmeh beit ia ka bor ding kumta kane ka la pynkulmar jingmut ia ki paidbah khamtam kito kiba shaniah beit ha ka bor ding elektrik.
Kumta halor kane ki paidbah ki kyntu ia ki bor pyn iaid ba kin ai ka jingpynbna kaba shai khnang ba ki paidbah kin nym kulmar jingmut bad lah ban beh ia ki kam khamtam ka jingshet jingtiew bad jingkhie step jongki ban iabeh ia ka bor lip bor ding.
Kiba bun ki paidbah ki pynpaw ruh kumba long mynta ka kynta pynlip bor ding ka jur katba ka bill pat ka la nang kiew . Kumta halor kane la kyntu ia ki bor ba dei peit ba kin leh ia kaba donkam na ka bynta ka bha ka miat ki paidbah.(SP News)
