Shillong, Risaw 27: U President ka Goro Student Union Tengsak G Momin hynne ka sngi ula ong ba ki nongialam jong ki 13 tylli ki sengbhalang kiba la iakynduh ha ri Lum Garo Hills kila shim ia ka rai ban pynlong ia ka Pakhang Surok Miet ne Night Road Blockade ha ka 29,30 bad 31 tarik mynta u bnai kaban sdang naduh ka por 7 baje janmiet kan kut pat ha ka por 5 abje mynstep.
U Tengsak ula ong ba ka daw kaba la pynlong ia ki sengbhalang ban bteng ia ki jingiakhih kadei halor ka jingmynthi jong ka sorkar ban pyntreikam ia ka Inner Line Permit kaba ki sengbhalang kila dawa. Nalor kane ula ong ruh ba ka jingthmu ka sorkar ban pyntreikam ia ka Tenancy Bill kadei tang ban pynthame ia u paidbah na ka jingdawa ki sengbhalang ia ka ILP.
shuh shuh ula ong ruh ba ka Tenency kan iarap ban tehlakam ia ki nongwei kan nym iarap haduh katta katta namar ka don ia kiba bun ki jingduna namar ba kane ka Bill ka thew tang ia ki nongshongwai bad kaei kaban jia pat ia ki iing kiba ki briew kiba sah da kaba shna da ki skum bad ki iing sop plastik hato kane ka ain kan tehlakam ia kine ki iing kiba don khamtam ha ki khappud bad ka Bangladesh khamtam eh ha ki jaka kiba don ki par dewiong.
Une u Nongialam ula ong ruh ba ia kane ka bill donkam ban iatai shuh shuh hynrei ka sorkar kam dei pat ban klet ban pyntreikam ia ka ILP kaba long ka ain kaba khlain bha ban tehlakam ia ak jingwan rung kyrthep ki mynder ri bad ki nongwei bad ula ong ruh ba ka jylla kala don ia ka Land Transfer Act hynrei kaei kaba jia ka long ba kane ka ain ka don la ki jingduna namar ba ki bar jylla ki dang lah ban pynhiar pateng ia ki jaka da kaba ioh jingbit na ki Dstrict Council.(SP News)
