Shillong, Naiwieng 10: U General Secretary ka Ri Bhoi Youth Federation (RBYF) Bah LK Sawkmie ula pynpaw ba ki sengbhalang kila iakynduh ha ka sngi thohdieng jong ka taiew bala dep kaba la long ha Nongpoh, Ri Bhoi District bad na ka liang ki 14 tylli ki sengbhalang kila rai ban pynlong ia ka Pakhang Surok Miet ha ka 12 tarik bad ha ka 15 tarik kaban sdang naduh ka por 8 baje mynmiet bad kan kut pat ha ka 5 baje mynstep.
Une u nongialam ka RBYF ula ong ba ki sengbhalang kila rai ban bteng ia ki jingiakhih ban dawa ban pyntreikam ia ka Inner Line Permit(ILP) ha kaba yn pynlong ia ka Pakhang Surok miet tang ha ka 12 bad 15 tarik bad ha ka 13 bad 14 pat ym shym la buh ia katei ka Pakhang Surok Miet namar ka jinglehniam Pomblang Shad Nongkrem.
“Ngi ki 14 tylli ki seng ngi pynrem jur halor ka jingkem ka sorkar jylla ia ka President jong ka CSWO ka kong Agnes Kharshiing, ka sorkar kala shu leh donbor ha kaba ka sorkar kala shu kem ia ka kong Agnes kaba ieng ha ka nongrim ban iada ia ka hok jong ki paidbah, ka long kaba lyngngoh ba na ka liang jong ka sorkar ka leh shilliang khmat, ha kiwei kiwei ki jaka kim leh hynrei ki shu sngap mynthi hynrei ki shu leh thik tang ia kane ka jaka bad ka sorkar ka la shu leh donbor. Ngi pynrem jur ia ka jingkem bad ngi dawa ba ka sorkar kadei ban pyllait noh mardor ia ka kong Agnes” la ong u bah LK Sawkmie.
Shuh shuh ula kyntu ruh ia ki paidbah jong ka bri u Hynniewtrep ban dang iatreilang bad iasnohktilang bad kine ki jingiakhih jong ki sengbhalang kiba long na ka bynta ka dawbah jong ka ri bad ka jaidbynriew.(SP News)
