Jowai, Kyllalyngkot 20: Ki sawtylli ki sengbhalang na Ri Lum Jaintia, ki ba kynthup ia ka All Jaintia Youth Welfare Organisation (AJYWO)- Central Governing Body, ka Khasi Students’ Union (KSU)- Jaintia Hills District Unit, ka Hynniewtrep National Youth Front(HNYF)-East Jaintia Zone bad ka Federation of Khasi Jaintia & Garo People(FKJGP)-Khliehriat Circle mynta ka sngi ha ka jingialang jong ki nongialam jong ki, ki la shim ia ka rai ban khot syndon da ka Pakhang Surok Miet ha ka 27 bad 28 tarik mynta u bnai, naduh ka por 7 baje janmiet haduh 5 baje mynstep ban pynpaw ia ka jingpyrshah jong ki ia ka sorkar Meghalaya halor ka jingbym sngap jong ka sorkar Meghalaya ia ka jingdawa jong ki ban maramot noh ia u National Highway 44 u ba la sniew palat mynta naduh Mookyndur haduh Malidor kat haduh ba u la ktah ia ka iaid ka ieng jong u paidbah. Kane ka jingpakhang surok miet kan trei kam ha East bad West Jaintia Hills District.
“Ngim ban se ban iaid noh da ka lynti jong ka jingiakhih hadien ba ka sorkar Meghalaya kam shym la bat la ka kular lane sngap ia ka jingdawa jong ngi ban maramot noh ia baroh ki bynta ba la sniew jong u surok bah NH 44 kata ia baroh ki bynta ba la sniew jong u, naduh Mookyndur haduh Malidor”, ong u Bah M H Dkhar, President jong ka AJYWO-Sengkmie.
“Ngim banse ban pynbna noh da ka jingiakhih namar ba ngi la isynei palat ia ka iaid ka ieng jong u paidbah naduh ki ba iaid lyngba ki kali rit haduh ki kali heh haba ki iaid lyngba u NH 44. Ynnai ia kren ia ki ba pang ba shitom namar nalor ka jingsniew palat jong utei u surok sa ka jingdheng kali ba man la ka por khamtam ha Tahkhniang Tuber Kmai Shnong, Lad-Rymbai, Khliehriat bad ha kiwei kiwe de ki bynta jong une u surok bah” ong sa u Bah Cherity Dkhar Suja, Asst. General Secretary ka KSU-JHDU.
U NH 44, u dei u thied snam jong ki ba bun ki jylla jong ka Ri India ba Shatei-Lammihngi. U NH 44 u long ruh u budlum jong ka sorkar Meghalaya. Ka jingsniew shisha jong une u surok ka la ktah shikatdei eh ym tang ia u paidbah jong ka jylla Meghalaya hynrei wat ia ki paidbah jong kiwei pat ki jylla ba Shatei-Lammihngi jong ka Ri India.
“Ha ka jingshisha, ngi la dei ban khot ia kane ka jingiakhi mynta hi ka taiew hynrei namar ba don ka Rupublic Day, kumta ngi hap khot noh ia ka ha ka 27 bad 28 tarik mynta u bnai. Lada ngim shim ia kane ka rai ban iakhih, ka por kan sa poi ha kaba une u surok un shim wat ia ka jingim briew bad ruh pyndkut syndon noh ia ka leit ka wan jong u paidbah lyngba une u surok bah bad ynda ka por kaba kum kane kan poi, u paidbah un sa hap ha ka apot sepngi” ong shuh shuh u Bah Suja.
“U Bah Dkhar u la ong shuh shuh, “Ngi la dep thoh sha ka sorkar bad ruh ngi la iakren ruh ha ka jingiadei bad kane bad ka sorkar Meghalaya ba la mihkhmat da u DC ka East Jaintia Hills District bad ruh u EE ka PWD (Rds) Central Division Jowai ha ka 17 tarik mynta u bnai ha kaba ka sorkar ka la kular ruh ha khmat jong ngi ban maramot noh ia u ne u surok da kaba sdang naduh mynta ka sngi hynrei phewse ym ioh i dak ei ei ruh em bad ka sorkar ka la shukor pynban ia ngi. Kumta ngi hap ban iaid da ka lynti jong ka jingiakhih”.
Na ka bynta ka bha ka miat jong u paidbah, ngi kyrpad u paidbah jong ka Ri Lum Jaintia, ki Nongialam Shnong, ki trai bad driver kali bad ruh ki para sengbhalang baroh ban ai ia ka jingkyrshan ia ngi ha kane ka jingiakhih jong ngi. Ngi kyrpad ruh ia ki paidbah jong ka Ri India ba Shatei-Lammihngi ban kyrshan lem ia ngi khnang ba kane ka jingiakhih jong ngi kan long kaba jop na ka bynta u paidbah. Lada ka sorkar kam pyni ia la ki jong ki kam hadien kane ka jingkhot pakhang surok miet jong ngi ngin sa nang pynbna shuh shuh da ki jingiakhih kiba tyngeh.” bynrap shuh shuh u bah Dkhar.(SP News)
