Shillong, Lber 27: U Nongialam ka Nationalist Congress Party(NCP) ka Meghalaya u bah Sanbor Shullai un sa shah jied kum u Symbud Lamphang ne u Deputy Speaker ka iing dorbar thawain ka jylla Meghalaya hadien bala don ka jingiapynbeit hapdeng ki heh ka seng Congress ka jylla bad ka NCP.
Katkum ki tyllong khubor bala iohlum la iathuh ba u kala don ka jingiapynbeit hapdeng ki heh ka seng Congress ka jylla bad ka seng NCP ha kaba kila ai ia ka jingmynjur ban jied ia u bah Shullai kum u Deputy Speaker ha kaba ka elekshon na ka bynta kane ka kyrdan kan long ha ka 18 tarik u Iaiong 2013.
Lah ioh jingtip ruh ba watla ka NCP kaba don 2 ngut ki MLA kala ai jingkyrshan ia ka Congress kaba la ialam ia ka sorkar jylla kam shym la ai bhah myntri ia kine ki MLA hynrei ha ka jingia pynbeit hapdeng ki heh jong kine ki artylli ki seng da kawei ka sur kila rai ban thung ia u bah Shullai kum u Deputy Speaker ka iing dorbar thawain kum ka jingburom ia u kum u nongialam ka NCP jong ka Meghalaya bad ka jingiatreilang bad ka sorkar MUA hapoh ka jingialam u Dr Mukul Sangma.
Ki tyllong khubor kila iathuh ba ka MUA II kaba synshar mynta ia ka jylla kin phah ia ka kyrteng jong u bah Sanbor Shullai ban iakhun ha kane ka elekshon Deputy Speaker jong ka iing dorbar thawain ka jylla.
Kumban shu pynkynmaw u bah Shullai ula shha thung kum u Deputy Speaker naduh u snem 2008 ha ka por ba dang synshar ka sorkar MPA bad hadien ba ka sorkar jylla kaba la synshar da kane ka kynhun kaba kynthup ia ka NCP, UDP,KHNAM,BJP,HSPDP bad ki kyrtong shimet kala khyllem noh bad la thaw ia ka sorkar da ka MUA hapoh ka jingialam ka Congress hynrei u bah Shullai ula ioh ban bteng beit kum u Deputy Speaker namar ym shym la don ki MLA kiban pyrshah ia u ban bat ia kane ka kyrdan.(SP News)
