Jowai, Kyllalyngkot 27: Ki Ar Seng hadien ba ki la ioh jingtip kaba tikna ba u CEM jong ka JHADC u la buh ia ka tarik lashai ka sngi 28th-jan-2014 kan don ka interview sop sop ia ki briew kiba u la thungkam sop sop hapoh JHADC ha kine ki khyndiat sngi khlem da ai jingpynbna paitbah (Advertisement) kumba la ju leh baroh shi katta katkum ki kyndon thungkam thungjam, ki la pynpaw iaka jingbitar bad ka jingpyrshah kaba jur haduh katta katta, namar kane ka jingleh tuh ka knieh noh iaka hok jongki khun samla ka District kiba la nang la stad bad kiba kyrduhkam.
Halor kane ka nongrim, na ka liang ki Ar Seng ka JSU&JYF ki dawa na u CEM ka JHADC ba un sangeh noh shi syndon ia kane ka jingleh bor bad leh shilliang khmat ha ka ban thungkam sop sop ia ki briew la jong, namar ka JHADC kam dei ka Private Bussiness jong u hynrei ka dei ka jong u paitbah, kiba la jied ia ki MDC ban long ki nongiada ia ka hok ka kynti kum ki shakri ki ban peit bad pyniaid ia ka jinglong ryntih
ha ka shynshar ka khaddar hapoh jong ka JHADC.
Pynban ka jingleh jong u Madonbai Rymbai CEM ka JHADC ka long thik la kum ba dei ka hok jong u ne ka property jong u ia ka JHADC, ha dien ka jingtip kaba bniah ki nongialam jongka JSU & JYF ki mut ban leit ia kynduh bad u mynta ka sngi 28th-01-2014 ban ia kren ia ka jingeh jong ki khun samla wad kam, u la kyntaid da kaba aidaw da kumne kumtai, bad u la pynmeh beit daka light saw baroh shi sngi habar ka karma jong u.
Ka long kaba sngewlehrain ba kat u CEM u sheptieng ban ia kynduh bad ki nongialam sengbhalang ki ba wan ban ia kynduh ia u da ka burom, hynrei um plie satia ia ka jingkhang jong ka jingiakren kaba long ka lad ban poi sha ka jingia sngewthuh ban ioh weng ia ki jingeh kiba mih na ki samla wad kam kiba la passed ia ki kyrdan bapher bapher jong ki. Namar ka jingbym iohlad ban ia kynduh ia u CEM na ka liang ka JSU bad ka JYF ki la ai tang daka jingthoh ha kaba la dawa beit shisyndon ba u dei ban pynsangeh iaka jingthungkam sop sop bad ruh u dei ban pynbna paidbah ia baroh ki post kiba la shu thung sop sop naduh kipor bala dep kumjuh kiba mynta khnang ba baroh ki samla wad kam kin iohlad ban iakhun iaki kam bapher bapher.
Kumta na ka liang ka JSU&JYF ki dawa na u CEM kumjuh na u Secretary ka Executive Committee ka JHADC ba ki dei ban sangeh noh shisyndon ia ka jingthmu ban interview sop sop ne thungkam sop sop ia ki briew lashai namar ba u CEM u la pynkhein ia ki kyndon thungkam jong ka JHADC da ka ba leh be-ain khlem da ai jingpynbna ne advertisement ka ba long ka lad jingtip ia baroh ki samla wad kam ba kin ioh ban pynkhreh ialade ban ialeh ia ki post bapher bapher kiba don hapoh ka JHADC.
Lada ka JHADC kam shahskhor ia ka ne ka jingdawa, ki ar seng ka JSU&JYF kim banse ban iaid da ki lynti jong ka jingiakhih pyrshah ia ka JHADC ban pynbor ia ka ban weng noh shisyndon ia kane ka jingthungkam sop sop bad interview sop sop pynkut u kyrwoh na ki ar seng.(SP News)
