Jowai, Rymphang 05: Ka Jaintia Students’ Union (JSU) bad ka Jaintia Youth Federation (JYF) ki pynpaw ia ka jingbitar halor ka jingthok jong u CEM ka JHADC u
Madonbai Rymbai u ba la kular ban ai jubab ia ki Ar Seng hapoh ka
3rd-02-2014 halor ka jingthungkam sop sop jong u hapoh ka Council
khlem da ai jingpynbna (Advertisement) paitbah ha ki lad pathai.
Kum ban shu pynkynmaw ba ha ka 28/01/2014 na ka liang u CEM u la khot
iakren ia ki nongialam jong kine ki ar tylli ki Sengbhalang ka JSU&JYF
hapoh ka karma treikam jong u khnang ban dup ioh iakren sani bha halor
kane ka jingeh kaba mih hapdeng ki samla wad kam bad ka jingthung kam
beain hapoh ka JHADC, ha kane ka jingia kren bad u CEM na ka liang
jong u la kular ban ai jubab ka ba biang haduh ka 3rd/02/2014 ia ki ar
Seng.
Hynrei na ka liang jong ki nongialam jong kine ki ar tylli ki
sengbhalang ki ieng skhem ban dawa beit na u CEM ba u dei ban weng noh
shi syndon ia ki to kiba la dep thungkam sop sop bad phah noh ia ka
jingpyntip paidbah (Advertisement) ia kito ki Post bapher bapher kiba
la dep thung naduh kine ki snem bad ki bnai kiba la dep khnang ba
baroh ki samla wad kam kin ioh lad ban ialeh iaka interview ha ki
kyrdan bapher bapher.
Na ka liang kine ki ar Sengbhalang ki la pynpaw ruh iaka jingsngew
bitar halor ka jingleh khliehshrieh jong ka Council hapoh ka jingialam
jong u Madonbai Rymbai kum u CEM halor ka jingkhot interview bad
thungkam sop sop jong u kaba long shabar ka Budget jong ka Council ka
ban sa long ha u bnai March 2014 hadien ka samoi MDC lane ka Sorkar ka
ban lam khmat ha JHADC.
Shuh shuh u CEM ryngkat bad ka EC jong ki dei ban weng noh shi syndon
ia ka ne ka jingleh arsap bad leh shilliang khmat, kaba la long shabar
ki kyndon thungkam thungjam jong ka Council, namar ka JHADC kam dei ka
kam khaii jong u (Private Bussiness) ne ka hok kynti (Own property)
jong u hynrei ka dei ka jong u paitbah, kiba la jied ia ki MDC ban
long ki nongiada bad ki nongwan rah jingkylla hapoh ka JHADC lyngba ka
shynshar ka khaddar ka ba khuid.
Kumta na ka liang ka JSU&JYF ki dawa na u CEM kumjuh na u Secretary
ka Executive Committee ka JHADC ba ki dei ban sangeh noh shisyndon,
lym kumta ngin leit ban ujor syndon ha kashari pyrshah ia u CEM ka
JHADC pynkut u kyrwoh na ki ar seng.(SP News)
