Jowai, Rymphang 10: Hadien bala mih pyrthei ka khubor bamsap kaba la poi shaka 1 klur 18 lak, naka liang ka UDP Jaintia HIlls haka jingiakynduh bad ki nongpathai khubor kala pynpaw iaka jingsngewkhia bad pynrem jur ia u Chief Executive Member (CEM), ka Jaintia Hills Autonomous District Council (JHADC), u ma Madonbai Rymbai.
Ka jingpyndonkam bakla ia ka pisa paidbah kaba haduh 1.18 klur kaba la paw pyrthei lyngba ki lad pathai khubor da ka jingiarap ka RTI report, ka UDP ha Jaintia HIlls ka la byrngem ban kiew sha iing iingsaw pyrshah ia u Chief Executive Member ka JHADC namar ba ka kam bamsap kala nangjyllei hapoh ka JHADC.
Joint Secretary ka Party, u ma G. Lamare, ula ong ba u CEM ka JHADC u la sei hi iaka pisa ha ka kyrteng jong ki paidbah na ka bynta ka jingmyntoi shimet jong u bad na ka liang ka party, ha ryngkat ki nongialam ka Party ha ka jylla kila rai ban ujor pyrshah sha ka iing Kashari halor ka jingpyndonkam bakla iaka pisa paidbah ha katei ka council.
Haka jingiakren sha ki nongpathai khubor, u ma Michael Sayoo uba long u President jong ka Unit, ula ong ba naka liang jong ka seng ka la pyllait paidbah iaka manifesto jong ka Party mynta ka sngi. Ula ong ruh ba ka Manifesto jong ka Party ka don ka mat kaba kyrpang ban ialeh pyrshah ia ki kam bamsap hapoh JHADC.
U ma Sayoo ula ong shuh shuh ba ka seng kam lah shuh ban shu sngap bad ban shu shongkli kti namar ka kam bamsap ha JHADC ka jia bad iai jia na ka por sha ka por.
“Ki kam bamsap ki kynthup ia ka jingpyndonkam bakla ia ka pisa paidbah, ka jingthungkam be-ain kaba sop sop bad ka jingpyndonkam bakla ia ka bor da kito ki nongmihkhmat”, la ong u ma Sayoo.(SP News)
