Shillong, Risaw 10: Ka iing dorbar mynta ka sngi ka la ia kren halor ka resolution jong u bah Ardent Basaiawmoit kaba u la leit rah hapoh ka iing dorbar ha kaba ia dei bad ka phang ka Inner Line Permit (ILP).
Ha dien ba ka la don ka jingiatai halor kane ka phang u bah Ardent u la kyntait ban weng noh ia kane ka resolution bad na ka liang jong u speaker u la shim ia ka rai ban shu ia vote noh da ka “Voice Vote” ha kane k a jingvote kiba pyrshah ia ka ILP ki la jop bad kiba kyrshan ki la rem.
Ha jingkren jong u Bah Ardent haba wanrah ia kane ka resolution u la ong ba kumba ka long mynta ka jylla Meghalaya ka jingwan tuid jong ki briew kiba na bar ka long kaba la palat kumta ban khanglad ia kane dei ban pyntreikam ia ka ILP ha kane ka jylla.
U Bah Ardent u la ong ba ki seng sain pyrthei kidei ban peit ban nym pynlong vote bank ia kine ki briew kiba wan na sha bar, u la ong ban a ka liang jong u u sngewdaiw shisha ia ka jinglong jingman jong ka shong suk shong sain ha kane ka jylla.
Haba jubab ia katei ka jingkren na ka liang jong u myntri rangbah ka jylla u Dr Mukul Sangma u la ong ba ka sorkar ka shim khia ia kane ka jingwan tuid jong ki briew kiba na bar ba kumno ban iada ka sorkar ka la shim bun ki lad ki lynti.
Kawei na ki lynti kaba ka sorkar kan shim nalor kiba ka la dep ban pynkhreh ka long ba ka sorkar kan leit sha ka sorkar pdeng ban dawa ba dei ban pynkylla noh ia ka Representation of People’s Act ban pynthikna ba ki briew kiba na bar kimd ei ban ioh ia ka hok thep vote.
Ha kane ka jingiakren ia ka ILP la don bun ki nongmihkhmat kiba la ia kren na baroh ar liang na ka liang synshar bad kum juh na ka liang pyrshah. Hynrei ka iing dorbar ka la kyntait ia kane ka resolution da ka voce vote.(SP News)
