Shillong, Nailar 27: U myntri rangbah ka jylla u Dr Mukul Sangma u la ai ia ka dorkhas sha u myntri rangbah duh jong ka Ri India u Dr Manmohan Singh ha Nongbah Delhi bad ha kane ka dorkhas u u myntri rangbah u la kdew ka sorkar Meghalaya ka don kam ia ka jingbei pisa kaba kyrpang na ka sorkar pdeng kala kot sha ka T. 1500 klur tyngka na ka bynta ki skhim kiba kyrpang.
Ki skhim kiba u myntri rangbah u la pan jingiarap kyrpang na ka sorkar pdeng ki kynthup ia ka “International Centre for Performing Arts and Culture” bad kajinglut na ka bynta kane kan long kumba T.350 klur.
Ha kane ka dorkhas umyntri rangbah ka jylla u la pan ruh ia ka jingiarap kaba kyrpang na ka bynta ban tei ia ka iing dorbar thawain ka jylla namar kumba ka long mynta ka jylla Meghalaya kam don ia ka iing dorbar thawain hadien ba la pluh noh kaba rim. U myntri rangbah u la kdew ba ka jinglut na ka bynta kane kan long T 350 klur kyntup ia ki wei ki jingtei ha kaba ia dei bad ka iing dorbar.
Haba phai sha ka koit ka khiah u myntri rangbah u la ong ba ka jylla Meghalaya ka dang sah dien ha kane ka bynta na ki daw kiba bun. U myntri rangbah u la kdew ba ka jingdon jong ka jaka purl doctor ha North Eastern Indira Gandhi Regional Institute of Health and Medical Sciences ka lah ban pdiang ia ki samla pule tang 50 ngut bad ka jylla Meghalaya ka ioh bynta tang 9 seat.
Hynrei ka jingdon kam ia ki nongtrei ha ki hospital bad ki jaka sumar ka don kam shibun kum ki doctor, ki Nurs, ban leh ia kane ka jylla ka don kam ia ka Medical College ban sdang ha kane ka jylla bad kum ka jingsdang ka jingdon kam pisa kan long T.160 klur.
Kiwei ki project kiba ka sorkar ka kwah ban pyntreikam ki long ka Integrated Ganol Drinking Water Supply bad Irrigation Project na ka bynta kane ka jinglut kan poi sha ka T.350 klur. Haba ia dei bad ka New Shillong town Ship ka sorkar ka kwah ban sdang noh ia kane bad ka jingdon kam na ka bynta kane ruh ka long T350 klur.
Haba phai pat sha ki lad ioh kam ioh jam na ka liang jong u myntri rangbah u ong ba don kam ban don ia ka State Technical University ban ia beh bad kane ka juk kaba mynta ban seng ia kane ka sorkar ka don kam pisa T.60 klur.
Haba ia dei bad ka Integrated Basin Development and Livelihood Promotion Programme na ka liang jong u myntri rangah bah ha ka dorkhas u la kyntu ia ka sorkar pdeng ba kan beipisa 100% na ka sorkar pdeng namar kane ka skhim ka long ban kyntiew ia ka ioh ka kot jong ki paidbah ba duk ba rangli ha kane ka jylla. Ha ka Dorkhas u myntri rangbah u da kyrpang ia ka sorkar pdeng ba kan pdiang ia kane ka jingpan jong ka sorkar jylla. (SP News)
