Shillong, Kyllalyngkot 14: Ka Dte. Of Field Publicity, Govt. of India, Nongstoin Unit ka la pyllong ka jing pynshai paidbah halor ka koit ka khiah ha Nonghyllam ha ka 12 tarik January 2013. Ha kane ka prokram, ka la pyllong ia ka jing ia iaid paid (Rally) ryngkat ki placard bad ki banner ban pynshai ia ki nonghong shnong khamtam ha ki jaka kyndong jong ka district.
Ha kane ka Rally la ia shimbynta da ki spah ngut ki Samla kynthei bad shynrang bad iai pyrta ia ka jing donkam ka jingkoit jingkhiah ha ka jingim jong ngi baroh. Ka theme ha kane ka jing iaid paid bah ka long halor ki prokram ka Health department kum ka Immunisation, Malaria bad ki programme naka bynta ki Longkmie bad ki Khyllung.
Hadien ka jingiaid paidbah la pyllong ruh ia ka jing ialang ban ai jinghikai ia ki nongiashim bynta ha kaba i Bah L. Marwein, Supervisor, District Malaria Office, Nongstoin i la batai bniah halor ka phang ka jingkoit jing khiah bad kumno ban iada na ka jing pang Malaria. La ioh ruh ia ka jingkren na i Bah N. Marwein, Rangbah Shnong, Nonghyllam bad na i Sr. Angela Dkhar.
