Shillong, Kyllalyngkot 20: Ka Telecom jong ka sorkar pdeng kaba dei kawei na ki nongsam ia ki lad phah khubor lyngba ka telephone kala shim ia ka rai ban pyniar shuh ia ka jingpynioh ia ki line telephone sha ki nongkyndong ha kane ka jylla Meghalaya.
Ban pynbha shuh shuh ia kane ka jingpynioh ia ki lad phah khubor sha ka jylla ka BSNL ka la dep ban pynioh ia ki telephone paidbah sha ki 5132 tylli ki shnong bad mynta kin sdang sa ka internet sha ki 220 tylli ki skul sha ki nongkyndong kane ka jylla ban pynshlur ia ki paidbah bakin pyndon kam ia ka internet.
Lyngba ki telephone lah ban ia sam lem ia ki jingtip sha ki paidbah kiba don kylleng sawdong bad kane ka long ka lad ia ki paidbah ban tip ia ka jingkylla jong ka por bad ka juk kaba mynta. Na ki 220 tylli ki ksul kiba la buh thong ban pynioh ia ka internet na kine 160 tylli ki skul la dep ban ai internet.
U General manager jong ka BSNL John Chrisostom ba dei peit ia ka “ICT u la ong ba kane ka dei ka plan jong ka sorkar pdeng ban pynioh ia kine ki internet sha ki skul kumba 220 tylli ha kane ka jylla Meghalaya.
Nalor katei ka BSNL kan air uh ia ka 10 MBPS broadband facilities sha ki shnong ha kane ka jylla Meghalaya na ka bynta ban pyndon kam ha ki kam pynroi bapher bapher bad na ka bynta kane la buh ruh kumba 500 tylli ki digital satellite phone ha ki nongkyndong.
U Chrisostom u la ong ba man ka shnong ha kane ka jylla Meghalaya kin ioh ia ka 10 mbps broad band na ka National optical fiber network bad ka jingpyntrei ia kane ka skhim ka dang iaid sha phrang bad hapoh shisnem kin lah ban pyndep ia kane ka plan.
Ban pynkhlian ia ka jingphah khubor sha ki nongkyndong ka long kaba don kam shisha bad lyngba jong kane ka jingim jong ki paidbah sha ki nongkyndong kala wanrah ia shibun ki jingkylla bad kane ka la wanrah ia ka jingkylla ha ki liang baroh ha ka ioh ka kot jong ki paidbah.(SP News)
